Minister Dangui Oduber a reuni cu DVG y a toca e tema di maneho 2021-2025

Minister Dangui Oduber a reuni cu DVG y a toca e tema di maneho 2021-2025

Lo mester enfoca hopi riba prevencion di salud  - *Uzo di tecnologia y digitalisacion lo ta primordial

ORANJESTAD (AAN): Diaranson Minister di Salud Publico Dangui Oduber a reuni cu directie hunto cu management team di DVG. Den e reunion aki a amplia y elabora riba e maneho cu mester wordo hiba den e gobernacion 2021-2025.

            Durante e combersacion aki minister Oduber a comparti e vision cu e kier mira den Salud Publico. A splica DVG riba e maneho cu ta wordo hiba riba mehoracion di e calidad di cuido, mehoracion di servicio y baha e tempo di spera na e specialistanan.

            Lo bay percura pa busca mas specialista y lo bay inverti y ehecuta e programa nacional di prevencion, tambe lo bay enfoca riba hiba un bida mas saludabel. Den esaki ya caba Gobierno a anuncia cu lo bay bin cu un clinica pa combati obesidad. Esaki ta pa yuda e personanan obeso door di ofrece nan guia por medio di un trayecto pa asina percura pa nan por mehora nan salud y hiba un bida mas saludabel cu e meta pa preveni complicacionnan di Salud pa motibo di obesidad.

            Minister Oduber a trece dilanti den e reunion cu DVG lo mester bira un conseho di administracion caminda ta determina e maneho di salud publico na Aruba.

            Lo mester enfoca hopi riba prevencion di salud. Tambe minister Oduber a combersa riba e hecho cu lo mester reenforsa departamentonan di Salud Publico y DBZ.

            E pandemia a pone tur hende tur hende realisa con importante salud publico ta pa cuido medico na Aruba pesey e mandatario ta enfatisa riba e importancia pa inverti den prevencion y reenforsa den e departamento di salud publico.

            A ser papia tambe riba e parti innovacion den salud publico haciendo uzo di tecnologia pa mehora e servicio cu e departamento di salud publico ta duna na pueblo di Aruba.

            Minister Oduber su deseo ta pa durante e periodo di gobernacion aki ta pa automatisa e sistema di peticion di restaurant pa haci e proceso uno mas eficiente y rapido. Ta pa bay haci uzo di innovacion pa asina sincroniza e departamentonan di DVG, Brandweer y KPA pa di e forma aki por duna un mihor servicio na comunidad. 

            Tambe e mandatario a palabra cu lo bay tin consulta regular entre Ministerio di Salud Publico, Inspectie Volksgezondheid Aruba (IVA) y DVG pa asina tur Partido ta riba e mesun liña di pensamento na tur momento.

            Finalmente Minister Dangui Oduber ta haya cu e reunion tabata uno fructifero caminda cu DVG a compronde e mensahe di minister Oduber y a compromete nan mes pa ehecuta e maneho y vision di Ministerio di Salud Publico.