ORANJESTAD (AAN) – Minister Dangui Oduber, titular di Salud y Turismo, a anuncia Diahuebs desde Baby Beach,
cu na mes momento cu e fase 2 di e proyecto aki keda cla, lo cuminza cu e proyecto di Rodger’s Beach, cu tambe ta forma parti integral di e Master Plan di mehoracion di e infrastructura, parkeo, embeyecimento y iluminacion di henter e area.
Esaki ta den planning di cuminza e aña aki, pa medio di e fondonan di TPEF (The Tourism Product Enhancement Fund) unda a pone un miyon florin disponible, pa asina por cuminza cu e proyecto di mehoracion di e area di Rodger’s Beach tambe, kiermen cu pa fin di aña 2023.
E mandatario ta spera di por entrega e bunita proyecto di Baby Beach fase 2 y fase 3 hunto cu e parti di Rodger’s Beach, cu nan dos hunto lo bira dos bunita proyecto pa e area di Seroe Colorado y henter San Nicolas. E minister a expresa cu e ta tabata dunando atencion caba na e area aki, pero e pandemia a bin y trece cune un pause di dos aña, si no e proyectonan aki ya caba mester a wordo entrega. “Pero e atencion cu nos a pone, conforme nos vision, nos programa di gobernacion, di no solamente anuncia pero percura pa busca e fondonan y haci e inversionnan necesario, y tambe percura pa deliver y ehecuta tur e proyectonan cu nos ta bin ta anunciando y pesey mi ta contento cu nos tey aki presente conhuntamente cu e contratista, cu un miembro di Parlamento tambe, y prensa, pa nos haci un recorido y wak con e proyecto ta andando y informa comunidad ki tempo e proyecto por wordo entrega”, e dignatario a reitera.
Di e manera aki, segun e mandatario, Gabinete Wever-Croes 1 y 2 ta mustra cu nan ta cumpli cu e compromiso cu nan tin cu e Distrito di San Nicolas, no solamente pa anuncia plannan, pero pa ehecuta nan tur tambe.
