Durante tratamento di Presupuesto Supletorio
ORANJESTAD (AAN): Durante e tratamento di presupuesto supletorio cu a tuma luga diaranson den Parlamento di Aruba, Minister di Turismo, Transporte y Labor, mr. Wendrick Cicilia, a duna un relato detaya di e accionnan, logronan y prioridadnan di su administracion den e areanan di turismo y labor.
Minister a enfatisa cu turismo ta sigui ta e pilar principal di nos economia y a enfatisa e importancia di diversificacion di mercado, y desaroyo di productonan turistico innovativo. Pa Minister Cicilia, ta importante pa evalua e accento di maneho di turismo. Colectivamente kier bay den otro direccion, mas controla y mas conecta cu nos comunidad. No kier mira mas expansion desproporcional, pero kier mas bien pa e tin un balor agrega pa nos hendenan y nos economia. Riba medionan social por a mira e concentracion di turista den areanan publico, esaki ta algo cu ta molestia nos comunidad, nan ta sinti cu nan a sacrifica hopi pa loke ta e modelo di turismo.
E maneho di turismo mester ta conecta cu e necesidadnan di nos comunidad. Minister Cicilia a expresa cu den prome inicio di gobernacion a inverti den comunidad di Aruba a tuma decisionnan na bienestar di comunidad manera e aumento di pensioen pa nos grandinan, aumento di bijstand y kindertoeslag.
Pa loke ta trata labor, Minister Cicilia a enfatisa cu ta necesario pa prepara e forsa laboral local pa e retonan den futuro. El a splica cu, hunto cu institutonan educativo y sector priva, ta promove programanan di formacion y desaroyo pa cumpli cu e necesidadnan real di e mercado. Tambe el a menciona iniciativanan pa curasha empleo formal, mehora proteccion di trahado y garantisa condicionnan di trabao decente y sigur. Alrededor di 15% di nos hobennan no ta forma parti di nos mercado laboral ni tampoco ta den enseñansa, na aña 2023 e tabata 11% y na aña 2024 e tabata 15%. Esaki ta keda un parti cardinal den e maneho di Minister Ciciclia, ta importante pa conecta nos hobennan cu e mercado laboral.
E presupuesto supletorio, e minister a enfatisa, ta ofrece un oportunidad pa redirigi e recursonan den direccion di proyectonan cu ta fortalece tanto turismo como e mercado laboral. Esaki ta inclui inversion den infrastructura, programanan di desaroyo sostenibel y politicanan cu ta fomenta innovacion y inclusion social.
Minister Cicilia a reitera su compromiso pa traha den forma transparente y man den man cu comunidad, Parlamento, y e diferente sectornan economico, cu e meta pa consolida un crecemento balansa cu ta beneficia henter e poblacion.
"Aruba mester sigui crece na un manera ordena, moderno, y responsabel. Cada decision cu nos tuma ta busca pa crea un futuro mas fuerte pa nos trahadonan mientras ta mantene e liderazgo di nos pais den turismo regional", e minister a enfatisa.
