ORANJESTAD (AAN) – Minister Ursell Arends a menciona den conferencia di prensa di gobierno, Diaranzon, a menciona tres punto cardinal di prioridad, den e Nota di Maneho di Asunto di Adulto Mayor.
Un aspecto cu e ta atendiendo como prome punto di prioridad, ta e “bench mark” y e instrumento cu ta midi e 'zorgzwaarte'.
Esaki kiermen cu na e momentonan aki tin un 'zorgzwaarte' cu ta wordo implementa y maneha door di SABA y e ta di 1 te 5. Pero gobierno kier midi pa wak si di berdad esaki ta e miho instrumento cu ta aplicable pa Aruba, y mira tambe kico ta e gastonan cu mester wordo asocia cu cada nivel di 'zorgzwaarte', y esaki tambe ta forma parti di e miho reparticion di gasto.
“Pa loke ta trata e punto cardinal 2, ta cuido y bienestar di e adulto mayor. Akinan nos ta papia di e adulto mayor cu ta den casnan priva, tambe merece e mesun tipo di cuido cu tin na SABA, na e momentonan aki. Na Hulanda, un docter Geriatra ta suficiente pa atende cu 200 adulto mayor, y na e momentonan aki nos tin tres specialista den adulto mayor pa atende cu 194 adulto mayor den SABA, y aki nos kier pa e mesun tipo di calidad di cuido aki wordo brinda tambe na tur e 256 pashent cu tin den e casnan di cuido priva”, Minister Ursell Arends a subraya.
E di tres punto cardinal ta e cambio di perspectiva con Aruba, como sociedad, ta mira y anda cu envehecemento. E cambio ta pa bay den un perspectiva mas social. “Ora mi ta papia di esaki, ami mes como minister y gobernante, y como Gobierno di Aruba, nos ta imagina nos mes un Aruba unda envehecemento y nos adultonan mayor, no ta wordo asocia mas cu limitacion, malesa, of aislamento”, e mandatario a indica.
El a subraya cu en cambio kier mira un Aruba unda e adulto mayor ta disfruta di nan bida cu orguyo, dignidad y energia positivo. “Y esey ta loke ami, como minister di Asuntonan di Adulto Mayor, e prome minister cu ta encarga cu e ministerio aki, kier cambia den e perspectiva di nos comunidad”, Arends a acentua.
Pa logra esaki a presenta un nota di maneho cual ta basa riba dos punto cu ta: 1, e cuido adecua na e lugar adecua. E ta cuminza cu e cambio di perspectiva den e cuido na cas, unda cu e adulto mayor por tin tur e comfort, movilidad y espacio pa e por sigui disfruta di su propio hogar. 2, e perspectiva social di envehecemento y cuido, e nota di cambio ta papia di wak pa nos adultonan mayor por keda mas activo den nos comunidad y tin mas participacion.
