Aquannette Gunn di Partido MAS:
ORANJESTAD (AAN): Segun Parlamentario Aquannette Gunn di MAS, tabata dia 26 di October 2022 el a dirigi 6 pregunta na e minister di Transporte, Integridad, Naturalesa y ‘Ouderenzaken’, sr. Ursell Arends relaciona cu casnan di cuido pa personanan di tercer edad.
Ministro a tuma casi cinco luna pa contesta e preguntanan. Tin cu añadi cu den e lapso di tempo el a manda e mandatario 4 recordatorio (rappel). Analisando e contestanan ricibi y e tardansa pa haci tal, ta laga un sabor amargo y ta ratifica e falta di seriedad, honestidad y respet di parti di e mandatario pa cu Parlamento.
Un di e preguntanan haci na minister Arends ta cu si su persona por comparti cu Parlamento e lista di espera di tur e casnan di cuido subsidia door di gobierno. E contesta ricibi ta cu e lista actualmente ta worde revisa y actualisa pa por tin un bista real!
Ta un ironia, pues den e carta cu SABA/CMCC a dirigi na e mandatario riba 14 di november 2022, e fundacion ta haci mencion cu tin 165 persona riba e lista di espera. Ta e caso cu algun di e personanan di cual nan famia tin e posibilidad financiero a percura di interna nan sernan keri den un di e casnan di cuido priva, mientras cu kisas e cuido specialisa cu e persona tin mester no ta acopla cu e servicio cu por ser brinda.
Ta e deber di e mandatario pa e splica cuanto e cifra indica door di SABA por a cambia y ta crucial pa e minister duna cuenta cuanto tempo mas lo tuma pa e departamento concerni revisa y actualisa e data. Na momento cu minister Arends a haya e cartera di adulto mayor na september 2021 el a pone enfasis cu su persona SI lo percura pa e adultonan mayor haya e atencion mereci.
Mientrastanto 18 luna a pasa y ainda no tin nada concreto CON su persona lo bay ehecuta su vision. Pueblo ta cansa di scucha y of lesa palabranan bunita. Pa finalisa Parlamentario Gunn a subraya cu a yega momento pa minister Arends traduci su palabranan bunita den hecho.
