Edward Maduro:
- Reaccion riba Caso di Corte cu SADA a perde
- Raad van Advies no acuerdo cu versnippering
ORANJESTAD(AAN): Recientemente DIARIO a entrevista presidente di sindicato di Douane SADA, Edward Maduro, pa e duna un splicacion di e caso di corte cu recientemente nan a perde.
El a splica cu pa añanan largo despues cu Gobierno a cambia na 2017, SADA a haya su mes den un situacion unda cu a firma un convenio durante un reorganizacion cu minister Bermudez e tempo ey.
“Manera por corda na 2018 tabata tin varios walkout, unda cu nos a demostra nos malcontento pasobra e minister e tempo ey no tabata duna atencion y bisa y splica e pasonan cu e convenant firma”.
Una vez cu nos a cuminsa sinta cu e Gobierno, nan a priminti cu lo bay cumpli cabalmente cu e convenio aki y no a cumpli.
Esey a pone cu entre otro riba 11 di September di 2019 a pone Douane plat, pasobra e manera con Gobierno y minister a trata Douane sigur no tabata nada di acepta, segun e presidente di SADA.
El a sigui bisa cu Douane a bay Huez, y Corte a bisa cu e sindicato mes no tabata tin e derecho pa bringa e caso.
Segun corte, cada ambtenaar ora cu nan a haya nan landsbesluit mester a bay den bezwaar.
“Esey a sosode, unda cu casi fulle dienst di alrededor di 140 ambtenaar a bay den bezwaar contra e landsbesluit, unda cu den corte di prome instancia nos no a haya rason, despues di cual nos a bay den apelacion y fin di luna pasa un biaha mas e veredicto no a sali na nos fabor”.
En principio corte ta bisa cu e ambtenaar si e no ta di acuerdo cu e landsbesluit e por yega corte y corte eventualmente por hala esaki aden a base di e asina yama ‘algemeen beginsel van behoorlijk bestuur’ y otro argumentonan cu por bin dilanti, unda cu bo por bisa cu con e ley a wordo institui no ta cuadra, segun Maduro.
El a sigui bisa cu den prome instancia esey ta bon, pero cu despues corte a evalua e situacion y den corte su concepto e ta haya cu Gobierno a haci bon di revalua e convenant aki.
“Sinembargo nos no ta di acuerdo cu esey pasobra ora cu bo cera un contrato cu Gobierno basa riba negociacionnan y bo yega na un acuerdo, bo no por sin mes cambia contenido di e contrato”.
Esey ta caminda cu nos no ta di acuerdo cu corte pasobra Gobierno a instala un comision unda cu bo tabata tin DRH, Gobierno mes den e comision y sindicato den e comision.
E tabata un palabracion di un comision formal cu a lanta via un decreto ministerial, unda cu tur cos mester a cana bon, segun e presidente di SADA.
El a sigui bisa cu despues ta bin cu e argumento cu DWJZ y Raad van Advies a duna conseho negativo.
Segun Maduro esaki ta remarcable pasobra Raad van Advies ta bisa cu no ta di acuerdo cu ‘versnippering’ di BRA.
El a indica cu ta conoci cu brandweer y polis tin un structura di salario los di e BRA y esey ta e direccion den cual Douane a bay.
“Raad van Advies ta bisa cu no ta consehable pa sigui versnipper den e BRA, pasobra e ora ey bo ta haya bo cu tres pa cuater structura di salario”.
Apesar di e conseho negativo ey cu Gobierno a bisa cu e conseho di Raad van Advies tabata determinante pa haci un cambio den e convenio, pero bo no a tene cu tur e aspectonan cu Raad van Advies a tene cuenta cune.
E minister anterior literalmente a ‘pick and choose’ for di e consehonan di Raad van Advies, pa por a cuchiya e ambtenaarnan di Douane, segun Maduro.
