MEDELLIN: Aña 2022 a cuminza cu preocupacion grandi, y futuro scur pa e sector di panaderianan na Colombia, principalmente debi na e aumento drastico y asombroso di materia prima cu nan ta usando,
y ta parce cu no tin un limite pa esaki stop y trece un menaza pa e negoshi aki cu ta duna como 400.000 cupo directo di trabao na e pais, sin conta e 800.000 cupo indirecto, den como 25.000 negoshi.
Ya caba, varios Panaderia a mira con prijs di materia prima a subi y pasa 60% di aumento caba. Djis tuma e ingrediente mas principal, esta trigo cu ta wordo usa pa hariña y crea pan! Prijs di trigo aworaki ta wordo impacta fuertemente door di e aumento internacional cu ta sutando tur compania y panaderia.
Na Colombia, e produccion nacional di trigo ta djis 0.3%, pues nan tin di importa e resto 99.7% via lama principalmente for di Merca y Canada pa produccion di hariña.
Debi cu tin un caida di 33% di cosecha di trigo na Canada pa e.o. cambio climatico cu a pone e cantidad disponible bira menos, hunto cu e gasto adicional pa transporte logistico cu tambe a subi considerablemente di prijs, y pa colmo e Dollar mas fuerte awor, a pone tur cos alinea den forma desfavorable pa panaderonan na Colombia.
Bogota tin cerca di 8.000 panaderia, sigui pa Medellin cu 2.700, y Cali cu 2.500 panaderia.
Hopi incertidumbre: Cu tur e dificultad aki, ta keda e panaderianan ningun otro opcion sino aumenta prijs di e productonan cu nan ta produci, aunke ta hopi dificil pa pusha e costo riba lomba di e consumidor. E comerciante hopi biaha ta haye ta sacrifica parti di e costo, djis pa no perde cliente.
Panaderianan cu no ta hisa nan prijs hopi, ta haya nan obliga na compensa door di reduci e tamaño di e productonan cu nan ta bende, pa asina nan por keda cu cabez riba awa.
Ademas, esnan cu ta dedica nan mes na negoshi como panadero, tin di bira ingenioso pa busca strategia cu ta yuda nan genera mas productividad pa purba reduci e impacto riba prijsnan.
Panaderonan ta den tur clase di socio-economico y e situacion actual ta pone na riesgo e unidadnan economico aki, y e inevitable perdida di cupo di trabao.
Aunke ta posible cu e clientenan ta cuminza cumpra menos pan debi cu prijsnan ta subiendo, tin di corda cu e.o. habitantenan na Medellin ta usa un promedio anual di 13,5 kilo di pan. Den nuebe di cada 10 hogar, nan ta come pan, y corda cu Medellin ta e ciudad cu ta usa mas pan tradicionalmente den nan cuminda.
Di aña pasa caba prijs di pan a cuminza subi na Colombia. Den 2021 el a conoce un aumento di 11,34%. Balor di trigo den e mesun aña a subi cu 14,96%, mientras cu otro materia prima pa panaderianan, manera keshi a subi cu 12,97% na Colombia den 2021. Mesun cos a mira cu aña pasa caba Sucu a subi cu 14,64%, lechi a subi cu 12,79%, azeta a subi cu 47,98%, y webo a subi cu 18,36%.
Y ya caba 2022 a subi cu e nota preocupante, cu “tur cos a subi”.
