Mundo politico di Aruba tin un problema serio ora papia di infrastructura
*A construi brug y a cumpra tram pero a lubida barionan den yobida
*No a traha viaduct ni rotonde den barionan lubida di “Bo Aruba”
ORANJESTAD (AAN) — Ta cu hopi interes DIARIO ta tuma nota, di expresionnan cu ta wordo haci entorno di e problema serio cu tanto Arubiano ta enfrenta pasobra temporada di yobida simplemente a dicidi di ocasiona yobida.
Pa por comprende e misterio grandi di e problema serio cu ta presenta su mes atrobe na Aruba, mester bolbe un rato den tempo pa asina topa Mike Eman y Benny Sevinger cu a inunda Pueblo cu e promesa di e magia di e proyectonan cu lo a bay construi pa Pueblo.
Cu tanto Mike como Benny tin poco problema cu fantasia enfrente realidad, lamentablemente tabata conoci for di momento cu nan a pone man riba hospital Horacio Oduber, cu a bira asina peligroso cu hasta personal tabata tin miedo di e peligernan.
Afortudamente e asbest a kima riba dak sin afecta ningun hende y tabata tin suficiente material pa seca hospital ora awacero yena e edificio cu sumanan enorme di Pueblo a construi.
Kico Pueblo realmente tabata tin mester segun Mike y Benny, socio den e rapport di proyectonan Bo Aruba, cu mester a costa Pueblo por lo menos Un Biyon pasobra ainda interes no tabata conoce, tabata poco diferente di e necesidad real di Pueblo.
A cumpra tram. A construi un brug estilo Frances den e paisahe tropical di Aruba.
Sinembargo, e pregunta mas grandi a keda, kico realmente Mike y Benny a haci cu e infrastructura cu e Arubianonan den nan bario tabata anhela.
Ora papia di infrastructura, ta papia di e trabounan basico cu Gobierno mester haci pa cubri e prome necesidadnan di Pueblo. Awa, coriente ta parti di infrastructura di un pais, mescos cu school, cas y adaptcion di barionan na e necesidadnan di awe.
Caminda bista di publico ta yega tur dia, e plannan di “Bo Aruba” cu realmente tabata di e Aruba den mente di Mike y Benny, no a tene cuenta cu e problemanan basico di Pueblo di Aruba, cu ta problema basico na tur parti di mundo.
Barionan cu mester a haya prioridad pa asina wordo adapta na e exigencianan nobo, no a wordo yuda cu e 1.6 Biyon, cu a destrui e base financiero di Aruba y ta pone Pueblo awe paga belasting, pa asina e pais por a recupera.
Ora papia di barionan di Pueblo, no ta papia solamente di e grupo cu ta biba den barionan sigur den cercania directo di aeropuerto, hotel, oficinanan di Gobierno ni Penhouse di Mike.
Ora papia di infrastructura, e base cu un comunidad mester den practica, mester cuminsa atende e barionan cu tin problema pa luz y awa wordo conecta of cu no conoce caretera asfalta of sistemanan cu hasta ta haci cu hende no tin miedo di haci cierto necesidadnan sumamente humano.
1.6 Biyon di Aruba a wordo gasta, mientras continuamente condicionnan di tempo tabata bati alarma pa situacionnan serio cu por presenta pa habitantenan di barionan cu no ta biba caminda tram ta pasa.
Ora Mike y Benny a dicidi cu 1.6 Biyon lo a wordo gasta na Infrastructura, sigur mester a asegura cu un parti di e placa lo a bay directamente pa esnan cu no ta biba den condicionnan cu nan ta soporta un yobida.
Ta berdad cu Aruba mayoria di dia di aña tin solo briyante, pero ta bon conoci cu tin momentonan cu alarma grandi mester wordo bati pa resultadonan di yobida.
Mike tabata na haltura di esaki si mira e noticianan cu a aparece November 2016, ora Mike tabata Prome Ministro y Aruba tabata bou awa.
Ya na 2015 Mike y Benny cu directamente tabata encarga cu infrastructura tabata sa kico por pasa cu Aruba den yobida fuerte.
Ta sumamente tristo pa mira ciudadanonan cu tin miedo di bay drumi anochi ora nan mira lamper, cu por ta anuncio di awacero cu por destrui nan cas, nan trankilidad.
Mas tristo ta, cu ora papia di e destinacion di e 1.6 Biyon, e tabata cu na prome lugar e mester a garantisa, cu e Arubiano por drumi trankil den su cama ora tin yobida y no ta na careda pa scapa hasta su caminda den cushina.
Awe Aruba mester paga belasting pa cubri e pago y interes di e debenan cu rotonde, brug, tram, tur loke Mike den su Penthouse a considera importante.
Ta tristo pa scucha e realidad di Arubianonan cu no por papia di e parti cu nan a ricibi di nan Aruba pa drecha nan condicionnan di bida manera Mike a trece dilanti.
Awor Arubianonan ta en espera pa den un Aruba caminda Evelyn Wever-Croes a rescata situacion social, bay urgi e Gobierno actual cu a scapa Florin pa scapa tambe nan vivienda, nan trankilidad y bienestar, den temporada di yobida.
