Kiebra actual AVP ta surpasa kiebra di Betico cu e partido
- Un crimen a bira central den e problemanan interno di AVP
- Politica ta enfrenta su momento di mayor duda cerca Pueblo
ORANJESTAD(AAN): Aruba den ultimo dianan a registra su momento mas culminante den su historia politico. E kiebra actual den AVP a wordo causa pa un crimen manera informantenan a trece dilanti.
E situacion actual den AVP, a causa consternacion den Pueblo debi na e motibo di e problema cu a causa ruptura den e partido y cu ta hiba hopi hende na e preguntanan cu DIARIO a lansa for di e prome momento cu Mike Eman despues di e veredicto di Huez a duna sosten total na Benny Sevinger cu a ricibi condena pa un acto criminal.
Informantenan clave a trece dilanti cu e situacion actual na Aruba ta uno historico y cu ni e salida di Betico Croes for di AVP, por wordo compara cu loke a pasa actualmente.
“Te ayera e problemanan den mundo politico, tabata basa generalmente riba e sosten cu ta wordo duna na posicionnan den partido. Tabata trata di e puntonan di vista general riba por ehempel e maneho cu mester wordo hiba y desaroyonan cu por sostene of no riba asuntonan estatal,”a bini dilanti.
Ayera Aruba a haya e confirmacion cu Mike Eman a prefera di deshaci di baluartenan di su partido, personanan cu e mes a crea impresion di ta esnan mas yega na su persona, pa e duna sosten na Benny Sevinger cu a wordo manda prison pa medio di un sentencia di Huez.
Manera informantenan clave den observacion di mundo politico a trece dilanti, algo sumamente grave ta pasa na Aruba.
“Kico ta e punto central di e problema den AVP?” Informantenan a puntra.
Nan a mustra cu e miembronan di AVP cu a bandona e partido, tabata conoci como sostenedornan directo di Mike Eman y sigur su hendenan di confiansa cu a drenta e partido ora ya tabata conoci cu Mike Eman a hiba e pais na desastre financiero y tambe a pusha Aruba den e aventura cu Citgo.
E personanan cu awe ta bandona AVP, ta personanan conoci como e ala nobo di AVP y sigur Mike Eman, cu ta prefera di laga e personanan aki bay, perde dos asiento importante den Parlamento pa e sigui duna sosten na Benny Sevinger den Parlamento di Aruba.
E situacion ta grave segun informantenan ya cu Mike Eman ta bay contra decision di Huez cu Benny Sevinger no por representa Pueblo di Aruba, como persona cu a wordo condena dor di Huez.
Importante den e asunto aki ta bira e hecho cu Caso Avestruz a nace den seno di AVP y cu personanan cu lazonan directo cu AVP for di nacemento di e partido ta envolvi.
“Benny Sevinger no tin ningun significacion den e partido compara cu otro personanan cu a wordo sentencia den e caso aki,”a bini dilanti.
Mike Eman ta kibra cu su propio partido pa sostene Benny Sevinger, cu a duna fabornan na personanan cu no ta AVP pa motibo di Benny Sevinger, pero cu tabata den AVP prome cu Benny Sevinger.
Un situacion hopi serio a surgi na Aruba, tabata e comentario ayera mientras Pueblo tabata tuma nota di e decision di Mike Eman cu a prefera AVP kibra prome cu e exigi Benny Sevinger retira di Parlamento y sigui e sentencia di Huez, cu por bira pio ora apela e sentencia di Huez den un caso di crimen, cu awe ta kibra un partido politico na Aruba.
DIARIO ta keda den contacto cu informantenan di tur seno politico na Aruba, pa un desaroyo cu a shock e comunidad.
