“Orguyosamente” Wever-Croes ta ehecuta e maneho cu Mike a crea --- *Si Mike Eman tabata consistente Aruba lo no a conoce BBO te awe --- *Cu consistencia Mike a sconde cuatro aña ora su bomnan a rementa
ORANJESTAD (AAN) — Cu Mike Eman a nace pa manipula, a keda demostra atrobe na momento cu Aruba ta lucha contra e problemanan serio cu e union di Covid-19 y tension mundial di guera, a presenta.
Uno di e topiconan cu publico a comparti cu DIARIO tabata, cu Mike Eman a presenta riba pantaya politico atrobe pa acusa Evelyn Wever-Croes di inconsistencia den su maneho.
Si tin algo cu tur hende honesto mester acepta, ta e hecho cu Mike Eman ta e ultimo persona pa acusa cualkier persona di inconsistencia.
For di momento cu Mike Eman a hisa su dos dedenan na laira pa hura cu e lo traha na interes di Aruba, por papia di inconsistencia.
A base di su promesa, el a drenta oficina di Gobierno pa deshaci di e peso di BBO pa Pueblo na 2009.
Ta e promesa aki a haci cu Pueblo a duna Mike suficiente voto pa e sinta como Prome Ministro di Aruba, cu hamas por a kere cu nan vota lo a mata porvenir di e pais.
Na e momento cu Mike a sinta den su oficina di Prome Ministro, el a baha BBO cu mitar a base di documentonan, cu segun expertonan di Gobierno ta bisa, a hinca Aruba den desgracia.
Mike no a duna ni prueba cu el a studia e asunto di deshaci di BBO bon, ya cu e estudionan cu el a haci (sigur pa un Meester) no por wordo considera valido.
Pa Mike baha BBO na mita, Aruba mester a haci un debe di casi 100 Miyon, sin cu ta papia aki di e interes.
Pero te aki e consistencia di sikiera baha BBO a yega.
Mike a keda pega den su teoria di deshaci di BBO manera el a splica Aruba na 2010 ora e inconsistencia di e maneho di Mike Eman a haci, cu Pueblo a keda cu mita BBO, cu despues Gobierno di Mike mes a bolbe subi cu un porciento ora AZV mescos cu henter Aruba a cuminsa tembla sin temblor.
E debe pa Mike Eman no tabata problema, pasobra riba un tereno Mike tabata sumamente consistente.
Mike tabata crea problema pa soluciona despues y crea debe pa Aruba paga despues.
Asina Mike a haya 1.6 Biyon pa e spart cu proyectonan hunto cu Benny Sevinger cu Avestruz lo hiba dilanti Mesa Berde.
Cu e palabra “consistencia” no ta existi pa Mike, a keda demostra den e forma cu e tabata aumenta e sumanan di “Bo Aruba” pa Pueblo paga despues, cu ta awe.
Mike a bisa Pueblo cu refineria ta bini.
El a firma un acuerdo cu Nicolas Maduro pa e refineria di Vladimir Putin, cu awe ta orkestra un guera mundial.
Atrobe Mike a demostra cu e no ta consistente y nunca Citgo a bini Aruba, cu a keda pega den e debenan cu Mike a crea.
Ora e bom a rementa na 2017, Mike a bisa cu e ta bay cas. El a bay. E no a drenta Parlamento y pa basta dia Aruba no a tende mas di Mike.
Pero su partido a canta ‘Ban cas bek” y Mike a bolbe como dirigente di su partido pero a nenga di drenta Parlamento, cu mester a atende cu tur e bomnan cu el a laga atras pa Gobierno di Evelyn Wever-Croes atende.
Cuatro aña Mike a keda leu di Parlamento pa na 2020, ora pandemia a ataca Aruba, presenta atrobe pero sin consistencia.
Mike no a duna ningun prueba di consistencia ora el a nenga cu e ta autor di tur problema. Ademas Mike a bolbe cambia di opinion y a anuncia cu si Pueblo vota pa su partido, e lo drenta Parlamento.
Awe Evelyn Wever-Croes mester ehecuta e maneho cu Mike Eman a planea pa Aruba, cu ta e maneho basa riba e forma cu “orguyosamente” Aruba ta paga su debe.
Evelyn Wever-Croes mester corta tur gasto y percura pa Aruba “orguyosamente” paga tur debe manera Mike a priminti cu e lo a haci despues cu el a rementa situacion financiero di Aruba.
Awor Mike Eman ta bisa cu Evelyn no ta consistente.
Pero Evelyn a haci exactamente loke Mike a planea, cu ta exigi Aruba paga debe, baha salario di ambtenaarnan, soporta tur loke Hulanda bisa manera Mike a planea for di 2009 ora e pio engaño politico di Aruba, a haya su inicio den persona di Mike Eman!
