Wendrick Cecilia a bira muraya pa Mike sconde abuso y cobardia
*Benny a tene rapport di 1.6 Biyon scondi den su lachi na 2017
*Aumento pensioen cu 700 Florin ta coy rumbo di cementerio BBO
ORANJESTAD(AAN)—Ta un berguensa cu un pais manera Aruba cu algun luna pasa ainda tabata motibo di aplauso y reconocemento mundial pa su logronan, ta wordo transforma atrobe den un plataforma di politica barata, cu a destrui su pais manera no tin igual.
DIARIO cu rapportnan di instancianan mas importante di Aruba, por duna prueba kico Mike Eman cum suis a haci cu Aruba den e temporada cu Aruba a confia gobernacion den nan man.
Abuso sin igual a wordo comete contra e Pueblo di Aruba dor di Mike Eman y su grupito, cu a destrui tur loke por a destrui na Aruba.
Den lachi di Benny Sevinger na 2017, ora Aruba a bay eleccion, a keda scondi rapportnan valioso cu tabata papia di e abuso cu a comete contra Aruba cu awe no por disfruta di e recuperacion economico pa cual Gobierno Evelyn Wever-Croes a percura!
No ta trata solamente di e debe nacional cu Mike Eman a crea.
DIARIO ta papia cu prueba den su man y ta tira riba mesa por ehempel e rapportnan di Algemene Rekenkamer Aruba, e maximo autoridad riba maneho di placa di Aruba.
Prome cu eleccion 2017, e rapport oficial di loke tabata pasa cu e proyectonan PPS, a wordo entrega na Gobierno di Mike Eman cu mester a responde kico el a haci cu e suma di 1.6 Biyon cu e Miembronan di Parlamento di AVP a entrega ciegamente sin control na Gobierno di Mike Eman, cu a haya oportunidad pa spart placa di Aruba pafor di e sumanan di presupuesto.
1.6 Biyon a wordo pone na wega den e proyectonan PPS, cu Parlamento di Aruba no por a controla. E rapport a keda scondi den lachi di Benny Sevinger na 2017 ora eleccion a bati na porta y ya un Pueblo financieramente destrui dor di Gobierno di Mike Eman a dicidi pa cambio den Gobierno.
Awe e sumanan enorme cu Pueblo di Aruba mester paga durante e proximo decadanan ta uni na e debe nacional y tanto otro gasto cu Mike Eman a crea pa destrui futuro di Aruba, cu tabata e unico logro di Mike Eman.
Despues di eleccion 2017 manera un cobarde Mike Eman a desaparece for di panorama politico, despues di a duna prueba cu e no ta sirbi como lider y cu entrega di hasta su puesto como lider di AVP.
Mike a bay sconde ora Aruba mester a recupera y bou maneho di Evelyn Wever-Croes Aruba a subi un caminda nobo, di sacrificio y heroismo pa scapa Aruba.
Aruba a logra na man di Evelyn Wever-Croes manera rapportnan, cifranan, Reino y mundo ta admiti pa habri un caminda nobo pa futuro cu ta pone placa disponibel atrobe pa politiconan abusador manera Mike Eman, por probecha.
Mientras Mike Eman ta presente den mundo politico, Aruba no mester di otro enemigo y Mike Eman mes ta bon na haltura cu riba su mes e no por convence Aruba mas.
Esaki a haci cu awor e ta tene man di Wendrick Cecilia, cu e ta uza como un muraya pa e sconde manera semper el a haci hasta cu Pueblo di Aruba, cu a bira su victima directo y awe mester paga e debe cu el a crea.
E unico programa di gobernacion cu Mike Eman por entrega Pueblo según su propio palabra ta, cu orguyosamente Pueblo di Aruba ta paga e debe cu el a crea, cu ta hustamente loke ta pasa awe.
Pero naturalmente Mike Eman den su cobardia mester tin un escondite pa e no mustra e cara, cu e por sconde den su Penthouse di miyonario caminda e por anima su mundo di fantasia.
Mike a kere cu den e ultimo eleccion, e por a haya administracion di placa di Pueblo den su man atrobe, pero Aruba no a bay di acuerdo.
Cu mentira cu ta otro ta motibo di e cementerio financiero cu el a construi pa Aruba, Mike Eman a uza grandinan den comunidad cu su promesa cu e ta subi pensioen di behez.
Awe e promesa cu a dune tanto voto cu e lo subi pensioen di behez cu 700 Florin, ta parce di coy e mes rumbo di cementerio cu e promesa cu e lo deshaci di BBO cu el a haci Pueblo na 2009 y a habri porta pa e bira Prome Ministro.
Nunca el a kita BBO y a admiti cu e no por y awe ya por scucha sonido for di su campamento cu e 700 Florin aumento di pensioen di behez por baha y wordo ahusta si asina e logra forma Gobierno cu Futuro.
DIARIO ta en espera di e proximo wega di Mike Eman, e homber cu a destrui
Aruba y a laga atrás e mensahe cu e unico “raamwerk”cu e conoce, ta hinca Aruba den aventura, abusa di e confianza di Pueblo, pa e por sinta riba trono di Prome Ministro!
