Si bo Citgo a drenta awe Aruba lo ta den man di Putin
*Bo no tin cuero di cara pa hunga politica barata ainda?
*Merca a scapa Aruba dor di cera porta pa bo Nicolas
ORANJESTAD(AAN)- Un persona cu a resta un grano di sentimento, awe no ta bay hunga cu dolor di mundo pa asina nan trata di haya voto.
Awe Mike ta bolbe duna prueba, cu dolor di hende, dolor di mundo, ta a den oportunidad pa gana voto y asina sigui hunga rey di un pais cu el a destrui y cu a scapa di e desaster mas grandi cu Aruba por a confronta, cu tabata den man di Nicolas Maduro y Vladimir Putin na e momentonan aki.
Ta un berguensa pa mira con Mike ta baha for di su penthouse pa hunga e politica di mas barata cu politico por hunga, sigur na momento cu su partido mester bay dera su cara den suela manera un avestruz cu den Corte di Husticia a wordo transforma den un neishi di haraña ora ta trata e caso di Benny Sevinger y e grupo privilegia di partido AVP
Awe bobedad di Mike Eman ta ripiti su mes. Bobedad cu a bini dilanti cu pregunta con ta posibel pa manera den sala di Corte di Husticia a keda presenta, tereno di Pueblo a wordo reparti na personanan cu a mustra cuanto nan stima Mike y Benny.
Den nos ultimo edicionnan cu luho di detaye nos a splica con mundo ta yora, con hamber y miseria ta azota hende, cu ta den problema serio pa produci tambe awa y luz.
Cu Mike Eman no por comprende dolor di Pueblo, pa nos ta comprensibel pasobra e pober cu e ta manipula como uno di e politiconan mas desastroso cu Aruba a conoce (si no ta e pio gobernante cu Aruba a conoce) no ta nada dificil pa hende mira.
Mike ta biba den su Penthouse cu bista riba lama, pa asina e por vigila e costa Venezolano cu un dia e kier a uni na e costa di Aruba hunto cu su amiguito Nicolas Maduro, partner di Rusia cu awe ta mata hende y ta destrui mundo.
Esaki Mike kier a trece Aruba tambe. Partner di Nicolas Maduro cu a destrui Venezuela y a cambia e pueblo di Venezuela den un pueblo hambriente cu mester bandona su pais cu awor ta pesta cu hendenan cu ta causa susto na mundo.
Mike ta e homber cu kier a trece Citgo di Putin Aruba, cu awor lo tabata tin un refineria di Nicolas Maduro y di Putin y asina lo tabata parti di un guera, cu cualkier momento por bira mundial.
Si Mike asina bobo cu te ainda e no por a comprende cu ta e guera di su amiguito Putin di Citgo, cu ta wordo sostene dor di Nicolas Maduro na kende Mike kier a entrega Aruba, con Mike por kere cu e por goberna e pais aki?
Wega barata ta loke Mike ta hunga pa e por haya voto cu dolor di Pueblo manera ayera den e recesion di 2008 el a ciega tur hende cu baha BBO na mitar pa despues e crea uno di e pio debenan cu Aruba a conoce y cu te awor te Aruba strangula.
Berguensa cu un homber cu ta yama su mes politico di Aruba, por ta uza awa y coriente cu na tur lugar di mundo actualmente ta causa dolor y problema serio, pa kere cu e por haya voto.
Mike bo no tin cuero di cara?
Esaki ta e pregunta cu mester haci na loke ta yama su mes lider, pero solamente ta manipula Aruba cu mescos cu henter mundo mester mira con e ta bebe awa y con e ta haci cu coriente cu na paisnan grandi ta haci cu negoshinan ta cera nan porta.
Ta bon pa Mike recorda con hunto cu su grupito el a pone Aruba baila pa entrada di Citgo di Nicolas Maduro y Vladimir Putin, cu ta mata y destrui hende basta e keda na poder.
Lo ta bon pa Mike cuminsa coba poz y cumpra un burico pa e bay bende awa mientras den loke por bira un guera mundial, ta haci cu produccion di awa y coriente tin hende desespera.
Pa Mike desesperacion no ta conta. E ta den su Penthouse en espera di e momento cu e por baha gobierno pa asina e sinta y crea mas debe pa Pueblo paga. Pa asina e haci Pueblo mas pober pasobra e belasting cu Pueblo mester paga pa motibo di Mike, ta mas halto cu loke e mester paga na awa y coriente cu a subi pa motibo di Mike su compinchenan comunista cu e kier a haci doño di economia di Aruba.
