Rapport Refineria di Aruba por tin efecto pisa pa mundo politico
*Richard no por a bira Minister si ainda e por a actua pa Refineria
*Ley ta preveni corupcion cu screening di politico y hasta su famia
ORANJESTAD(AAN)—Mike Eman of Richard Arends a practica mentira enfrente Gobernador pa Richard Arends por a bira Ministro den Gabinete Mike Eman?
Esaki ta uno di e preguntanan pa cual Ministerio Publico mester busca contesta den su investigacion pero tambe uno di e puntonan cu lo bini dilanti den sala di reunion di Parlamento di Aruba proximamente.
Informantenan di DIARIO ta sumamente preocupa cu e efecto cu e desaroyonan rond di Refineria di Aruba por tin pa Pueblo di Aruba.
Segun expertonan mester bay te den fondo di e asunto aki.
Ministerio Publico mester defini si por papia aki di uno of mas casonan penal, pero mas preocupacion tin ainda pa e resultadonan cu e desaroyonan lo tin pa politica den bista di Pueblo.
Expertonan legal ta mustra DIARIO cu e desaroyonan por mishi na forma desastroso cu e imagen cu pueblo tin di politica y gobernacion, si den Parlamento tambe no bini accion den loke a pasa.
Manera DIARIO a mustra for di ayera e caso lo no mishi solamente cu Richard Arends pero tambe ta lansa pregunta riba e motibo pakico reunionnan cu Mike de Meza a tene mester a keda scondi mientras e pregunta mas grandi ta bira si ta Mike Eman cu mester a informa Gobernado oficialmente di e nombramento di Richard Arends como Ministro, of cu ta Richard Arends mes a practica mentira contra Gobernador pa asina Arends por a bira Ministro mientras ainda e tabata tin un funcion den Refineria di Aruba, manera ta bini dilanti den e rapport riba Refineria di Aruba.
Ley cu ta permiti aceptacion di candidato como Ministro, no ta permiti pa un Ministro tin otro funcion.
Informantenan a mustra cu den e screening di Richard Arends mester a bini dilanti loke den e Rapport di Refineria di Aruba ta wordo menciona.
Si Richard Arends tabata autorisa pa tuma decision na nomber di e Refineria di Aruba, manera ta bini dilanti den e rapport, na mes momento e no por tabata Ministro ya cu esaki ta un conflicto di interes segun e Ley cu ta atende cu nombramento di Ministronan di Aruba y e ley di screening.
Den caso cu Richard Arends, segun e Rapport di Refineria ta menciona, por a actua na nomber di Refineria di Aruba, el a viola Ley si e no a informa Mike Eman di esaki y si Mike Eman tabata na haltura e mester a participa esaki na Gobernador si Richard mes lo a trata di sconde e hecho aki.
Ley ta exigi pa tur atadura di un candidato pa Ministro y hasta di su famianan te den tercer grado ta conoci pa e Formador, cu mester pone Gobernador na haltura di informacion corecto.
Esaki ta pa preveni corupcion ora un persona ta gobernante.
Informantenan a indica cu un situacion sumamente serio a presenta su mes y ta mishi di e imagen di integridad cu gobernantenan mester tin.
Cualkier persona cu kier bira Ministro, mester pone tur otro encargo un banda segun e Ley cu no ta permiti pa Richard Arends a actua pa Refineria di Aruba y ta Minister na mes momento.
DIARIO lo sigui informa Aruba riba e rapport cu ta exigi seriedad debido di Parlamento pa atende ya cu e ta crea mal imagen politico na Aruba.
