Cual compania lo entrega su maneho na ex partner di Nicolas Maduro?
*Kico e desaster di 1.6 Biyon di “Bo Aruba”ta kita for di boca di Aruba?
*CafT a splica pakico paga debe ta stroba 700 Florin mas pa Pensioen
ORANJESTAD(AAN)—Awe Aruba ta wordo diariamente informa di e proceso di “screening”di Ministronan di Gabinete Mike Eman, cu aparentemente ta algo sumamente fastioso.
Cu ta bon pa tin un proceso di screening asina, sin duda ta bini dilanti, ora tira bista riba e logronan di Mike Eman den historia di Aruba pa asina yega na e conclusion, cu e logro di mas grandi di Mike Eman for di Status Aparte, ta concentra den Mike Eman mes, cu tabata tin Aruba pa e parti mas grandi di historia di pais Aruba, como su fuente di entrada.
Kico realmente ta nifica e palabra “screen”? Ta bay check e historia y detayes di un persona. Ta para keto na tur punto, cu por stroba e persona aki haci su trabou of ta duna prueba cu e persona no ta capaz pa cumpli cu loke su trabou ta exigi.
Den e proceso aki, dirigentenan di servicionan cu mester proteha bienestar di Pueblo, mester entrega nan conseho a base di diferente criteria pa evita cu Aruba ta cay den un desaster atrobe.
Realmente e ta un proceso conoci na tur compania priva, cu ta check tur detaye di un persona, pa asina asegura cu el a scoge pa un bon trahador den e rango mas halto te e rango mas abou.
Na e momentonan aki, sinembargo, por conclui cu ta perde tempo pa test Mike Eman y miembronan di e grupo cu tabata sombra di Mike Eman den e gobierno di Mike Eman, cu a destrui Aruba manera historia a demostra?
Lo no tabata suficiente pa haci djis un analisis di e pregunta, pakico Mike Eman mes a dicidi di retira di politica na 2017 a base di su derota electoral despues di e desastre cu el a duna Aruba como su herencia?
Den esaki por pidi tambe opinion di Nicolas Maduro, cu ora den un furia mundial contra su dictadura Mike a entrega refineria na su persona, a nenga e proposicion di Mike Eman pa Mike yuda soluciona problema di Venezuela.
Awe si screen mayoria di e personanan presenta pa goberna Aruba awor, ta topa cu figuranan cu a sostene e desastre cu casi a bira fatal pa Aruba y di cual Aruba solamente a scapa pasobra Reino a interveni.
Con ta posibel cu Aruba awor oficialmente ta screen miembronan di e grupo di Mike Eman, cu a zink bienestar di Aruba y hasta deshaci di autonomia financiero di Aruba?
Sin bay sikiera den asuntonan personal cu companianan tambe ta check pa dicidi si un trahador por haci su trabou, solamente basa riba loke DIARIO mester a raporta na Pueblo a base di rapportnan oficial, mester conclui cu e caranan bieu di AVP, incluyendo Mike no ta pasa e test di bon gobernante segun nos Leynan y sigur no segun e leynan cu ta dicidi con mester uza placa di Pueblo pa goberna.
E caranan bieu cu ta wordo menciona, a yuda Mike zink Aruba, cu e gobernacion di Mike Eman cu tabata basa fantasia y abuso di e posicionnan cu nan a ocupa y mester e exigi pa nan defende interes financiero y economico di Aruba.
Awe Reino Hulandes ta trece dilanti, cu por paga un Reparatie toeslag di 250 Florin cu ta nada compara cu e 700 Florin cu Mike Eman a priminti, pasobra Gobierno Evelyn Wever-Croes a laga e placa aki atras cu su maneho.
Sinembargo, directamente mara na e decision di e comision di supervision di Reino, CafT ta bini e advertencia cu mester uza tur placa cu Aruba tin na prome instancia na paga e debenan cu Mike Eman a laga atras, ya cu e interes so cu mester paga tin aparencia di un sistema solar.
Kico Mike a haci cu e debenan cu el a laga atras? Ban puntra Hospital cu Mike no por uza como su logro pasobra loke Mike a laga atras, tabata un hospital nobo cu tabata permiti yobida den e edificio, cu asfalt a pone na candela riba dak y tabata un desasperacion pa Aruba.
Awe Mike Eman por core riba careteranan cu tabata tin mester di placa cu Wever-Croes a pone riba mesa, pa evita cu na momento di yobida, trafico di Aruba tabata tin mester di servicio di ferry.
1.6 Biyon di Aruba Mike y Benny a pone na Aruba, mientras Mike no tabata sikiera capaz pa mira cu tabata tin un Avestruz den edificio di su Gobierno, den su grupo di amigonan, na man di su “back to back”Benny Sevinger”.
E maneho di Mike Eman tabata asina bon c e no tabata sa mes con “family and friends”tabata abusa di Aruba, cu casi a zink den hamber ora pandemia a bati na porta y Mike diripiente a core drenta for di “nowhere”cu e creencia cu e por a tolondra Aruba.
E speranza grandi ta cu screening lo splica Aruba kico a pasa cu Mike Eman ora despues di a destrui e barco Aruba, el a desaparece na 2017 cu e anuncio cu e ta bandona politica, loke a nifica cu e mes a mira su fin como politico for di 2017!
