Rechazo di Futuro pa candidata AVP pa Ministro Plenipotenciario un señal
*Cu tres asiento vs nuebe di AVP Ministerionan clave ta bay pa Futuro
*Economia, Finanzas, Relacion cu Reino den man di Gerlien y no Mike!
ORANJESTAD (AAN) — Mas cu 100 dia pasa, Aruba a bay urna electoral den un eleccion cu a wordo forsa dor di entre otro AVP y Futuro, cu a logro e posibilidad pa forma un Gobierno.
Un resultado cuestiona for di prome cu eleccion dor di Pueblo, cu a puntra su mes si salida di Princesa Heredero di AVP den pasado, Gerlien Croes, lo no a wordo sigui pa un reunion entre e partido Futuro cu Gerlien Croes a lanta y e AVP cu el a bandona.
Mike Eman cu a bay eleccion na e ultimo lugar riba lista di AVP , a logra di bira Formador di un Gobierno nobo a base di e alrededor di 300 voto mas cu number uno riba lista di AVP, e hoben profesional Wendrick Cecilia, a haci posibel na momento cu practicamente el a iguala Mike Eman den voto.
E rumor den Pueblo prome cu eleccion, Gerlien a kibra cu AVP na momento cu AVP a keda na suela den e scandal di Benny Sevinger, tabata un forma pa AVP mantene e votadornan disgusta di AVP cu e intencion pa reuni forza despues di eleccion.
DIARIO no a duna mucho importancia na e thesis aki, pero si na e hecho cu pa baha Gobierno, Gerlien a deshaci di e opinion publico cu ta presencia di Benny Sevinger den Parlamento, a haci cu el a separa di AVP, caminda e tabata wordo considera princesa heredero di e partido.
Despues di eleccion, Gerlien y Mike a uni pa a base di e alrededor di 300 voto mas cu a haci Mike supuesto ganador di eleccion, y asina e prome persona pa forma un gobierno.
Por a spera cu despues di e forma cu a manda Gobierno Wever-Croes cas, lo por a presenta un Gobierno sin perde mucho tempo.
Te awor Aruba ta en espera di un Gobierno nobo despues cu 100 dia pasa, Pueblo a bay urna electoral.
Te awor no por yega na un acuerdo pero si mester yega na e conclusion cu AVP ta depende di Gerlien, of en todo caso, cu nuebe voto no a haya e funcionnan mas importante den Gobierno sigur na e momentonan aki.
Mike por bira Prome Ministro, te caminda awor tin indicacion, si no bini sorpresa. Pero AVP cu nuebe asiento, mester tene cuenta cu e tres asientonan di Futuro, lo pone asuntonan di placa, pues Finanzas y Economia den man di un solo Ministro di Futuro y no di AVP, cu ta e partido cu tabata tin e base suficiente (mescos cu MEP cu 8 asiento) pa scoge un partner den Parlamento y forma un Gobierno.
Pues realmente e formador mester tabata Mike, pero el a bira Mike y Gerlien, cu a haya asuntonan di placa y di economia den su man, pero ademas e Ministerio cu lo atende cu asuntonan di Reino.
Na e momentonan aki, Aruba ta depende completamente di su bon relacion cu Reino pa asina e por sigui nabega den e desaster financiero cu Mike a crea den pasado y Gobierno di Evelyn Wever-Croes a transforma den un saldo positivo pa Aruba.
Mike no por mete den asunto di placa, pero a bay asina leu cu Mike no solamente no ta encarga cu Relacionnan den Reino manera informacionnan ta mustra, pero cu Mike no por crea ningun situacion cu por stroba Gerlien como Ministro encarga cu Asunto di Reino, haci su trabou.
Ta den e cuadro aki e candidata pa Ministro Plenipotenciario di AVP, cu tabata Desiree Croes, a wordo rechaza como Ministro Plenipotenciario, dor di Futuro.
E pregunta mas grandi ta bira awor, pakico Mike cu 9 asiento y candidato pa Ministro Presidente, a acepta e situacion?
Mike por fungi como Ministro Presidente den un Gabinete den cual su propio candidato pa Ministro Plenipotenciario a wordo rechaza dor di Futuro?
E pregunta ta surgi si Mike cu su 9 asientonan tin algun forza den un Gabinete AVP/Futuro, cu tur indicacion cu ta Futuro ta manda e mundo di Gobierno nobo di Aruba.
Cien dia a pasa y e partidonan cu a ocasiona caida di Gobierno Wever-Croes ainda no por entrega un Gobierno di cual Mike por ta Prome Ministro pero Gerlien ta encarga cu relacionnan entre Aruba y Reino, cu na e momentonan aki ta decisivo pa gobernacion di Aruba cu mester bay reemplaza RAFT, cu bon gobernacion di Evelyn Wever-Croes a bari for di mesa.
Riba tereno gubernamental un tempo sumamente interesante a haya inicio pa Aruba y sigur pa AVP cu a bay eleccion cu dos lider y aunke el a haya mayoria di voto, mester a forma Gobierno hunto cu Gerlien, loke por conduci na e pregunta grandi, unda confianza entre AVP y Futuro a keda y si Mike Eman lo bira Prome Ministro bou curatela di Futuro y Wendrick Cecilia como observador importante, ya cu ta Wendrick a encabeza e lista di AVP y a entrega Mike e votonan decisivo pa Mike gana eleccion cu un diferencia di algo mas cu 300 voto compara cu MEP.
Conclusion: stabilidad ta un pregunta y preocupacion cu Reino sigur no ta ignora!
