Eclipse solar a midi forza cu e poder politico inventivo di Mike
*Aumento cu 50 porciento di pensioen ta insulta sano huicio humano
*Mike y solucion imposibel pa e pensioen cu pronto e tambe lo cobra
ORANJESTAD (AAN) — Mescos cu practicamente tur hende na mundo, ayera nos tambe kier a goza un rato di e transmisionnan internacional di e eclipse solar.
Sinembargo, atrobe, Mike Eman a logra destrui e trankilidad normal di bida, cu un maniobra politico, cu a supera tur su obranan cu a hiba Aruba na estado di bancarota.
Awe pa comprende di kico Mike Eman ta capaz, mester bolbe na e momento cu el a presenta riba plataforma politica, pa cumpra curazon di e votador Arubano cu e grado mas barata di politica, cu historia a conoce te na momento cu el a dicidi cu ta su turno.
Mike a logra cu e comunidad Arubano a sostene su peticion pa dirigi e pais, cu e promesa cu e ta baha BBO cu mitar. E no a logra loke el a priminti, pero si a logra kibra record di abuso di placa di Pueblo, cu asistencia di su grupito.
Ora Mike Eman a laga Aruba na suela riba tereno financiero pero tambe cubri cu berguensa ora Hulanda a baha su persona como Prome Ministro di Aruba for di su escondite caminda supuestamente el a bay muri di hamber, el a trata na entrega Aruba na Nicolas Maduro, loke a bira un fracaso mas riba su lista di maniobra politico.
Despues di a pusha Aruba den abismo, Mike a desaparece y te awe ningun hende (te caminda nos por a wordo informa) ta na haltura kico a pasa cu Mike.
Diripiente, ora Gobierno di Evelyn Wever-Croes a pone Aruba atrobe riba un rumbo pa futuro, Mike a bolbe, bailando y gozando di e ambiente cu Gobierno Wever-Croes a logra hunto cu Arubianonan cu mester a haci sacrificio grandi pa scapa nan pais cu Mike Eman a laga atras den un situacion di destruccion di bon gobernacion, pero tambe dorna cu cantidad di escandalo y casonan di corupcion den sala di Corte di Aruba.
Hulanda a papia palabra cla. Hulanda cu a baha Mike for di Fort Zoutman, a wordo confronta cu e veredicto di e Comision di Supervision cu Hulanda mes a introduci pero cu a splica con bon e Gobierno di Evelyn Wever-Croes a atende cu e problemanan cu Aruba tabata tin, loke a resulta den un situacion cu porta pa futuro a habri atrobe pa Aruba a menos cu Gobierno duna continuidad, sigui cu e bon maneho di Gobierno Evelyn Wever-Croes y atende placa di Pueblo cu loke por considera e concenshi cu democracia ta exigi di un politico y cu Mike Eman no por tabata tin ora el a destrui e base financiero di Aruba y asina a hinca tur ciudadano den e necesidad financiero, cu debe nacional ta exigi.
Awe Mike ta baha na e nivel mas abou cu politica por conoce, haciendo uzo di e problema di edad halto cu henter mundo conoce actualmente, debi na e hecho cu hende tin un bida mas largo.
Ta un berguensa cu un homber cu ta bisa cu el a gradua como Maestro den Ley, kier pretende cu por subi pensioen di behez cu 50 porciento, pasobra Gobierno Evelyn Wever-Croes a logra soluciona e desastre financiero cu el a laga atras y a haci cu por lo pronto, Arubianonan mester paga e debe di berguensa cu gobiernonan di Mike Eman a laga atras.
Pa basta dia nos no a gasta palabra na Mike Eman, cu ta entrega na mundo e prueba, con facil ta pa hende destrui bienestar di un Pueblo y despues pretende di por bolbe na mando a base di logro di otro hende.
Sinembargo, nos mester defende e honor di e Pueblo di Aruba cu awe of den futuro (mescos cu Mike Eman mes) mester cuminsa cobra Pensioen di Behez.
Awe Mike Eman kier cumpra voto di Pueblo di Aruba cu e promesa mas falso cu hende por haci cu ta, pa den e situacion di e proceso cu e cantidad di pensionadonan rond mundo a aumenta, por bay subi e pensioen di behez di Aruba cu 50 porciento mientras den Reino mes tin problema pa mantene e actual sistema di pensioen di behez cu e poblacion creciente.
Ta bon pa Mike Eman cuminsa splica ki dia e lo alcansa e edad pa baha cu pensioen di behez y asina probecha tambe di e aumento di pensioen di behez cu mester considera un ridiculez politico di marca mayor, cu awe supuestamente e kier alcansa pa e grupo di grandinan di cual pronto e mes lo forma parti.
Ta bon pa Mike splica cuanto lo tarda pa cambio e ley y e fecha cu e lo cuminsa cobra e pensioen di behez cu e kier pa subi cu 50 porciento, loke lo rementa e fondo di pensioen, si no subi primanan na forma extraordinario!
