Prome Minister Evelyn Wever-Croes: --- "Si bo kier papia di trendsetter di energia, bo ta papia di Nel Oduber"
ORANJESTAD (AAN): Prome Minister Evelyn Wever-Croes, durante e reunion publico den Parlamento, a ricibi varios comentario di Parlamentarionan cu, segun Prome Minister, ta importante pa coregi. Apesar cu Parlamentario Mike Eman tabata ausente momento cu Prome Minister a duna su disertacion, Premier a coregi comentarionan di Parlamentario Eman.
Señor Eman a cuminsa su disertacion bisando cu mundo a brasa Aruba. Y a gaba cu Señor Biden di Merca a bras’e. Pregunta na señor Eman ta: “Ki bal Biden brasa bo y despues bo ta bay brasa Kiko Gomez?. Ki bal bo ta sinta banda di Presidente di Merca e tempo ey y despues bo ta bay sinta cu Roberto Rincon?”.
Den su disertacion tambe, Parlamentario Eman a bisa e ta e trendsetter den energia gabando su mes. Un actitud di tuma hopi tristo ora un persona gaba su mes.
Prome Minister a recorda Parlamentario Eman cu e no tin nada di gaba su mes pasobra durante ocho aña y gastando miyones di florin na biahamento, conferencianan green y propaganda, el a logra 5 megawatts so adicional na energia renobabel. Riba e website di Web, ta indica cu e parkenan solar cu a wordo inaugura durante Gabinetenan di AVP, ta yega na 5 megawatt so. Esaki sigur no ta haci Mike Eman un trendsetter di energia akin a Aruba.
“Si bo kier papia di trendsetter di energia, bo ta papia di Nel Oduber. Pasobra si tin un hende cu tin un vision pa ta un trendsetter den energia ta Nelson Orlando Oduber cu tabata 4 biaha prome minister di e pais aki. Danki na su vision nos tin e parke di molina di biento awe cu ta genera 14 megawatts. Trendsetter no ta esun di 5 megawatt cu tanto biyones di debe”.
Prome Minister ta haya si cu señor Mike Eman ta trendsetter berdad pero den e luz negativo. Señor Eman, como ex prome minister di nos pais, ta e trendsetter di debe. El a fia placa pa goberna e pais, pa paga salarionan, pa por paga debe, pa fiesta y celebra. El a redobla nos debe durante periodo di bonanza den apenas 5 aña. Un debe cu tabata na nivel di 2 biyon over di tur e añanan cu e la sinta.
Tambe señor Mike Eman como ex prome minister, ta trendsetter di welga di hamber y ohala e keda como prome y ultimo trendsetter di esaki pasobra el a pone nos cara na berguensa, Prome Minister a enfatisa.
Señor Mike Eman, como ex prome minister, ta e trendsetter di corupcion, Roberto Rincon, ministernan bou investigacion, negoshi di tereno y di permiso, el a ricibi donacionnan di Roberto Rincon. “Lo mas tristo ta cu esaki no ta un berguensa solamente pa Mike Eman, sino pa henter Aruba”, Prome Minister a enfatisa.
“Tur hende sa cu señor Mike Eman ta un trendsetter den debe, den corupcion den cobardia. Mike Eman ta un berguensa pa Aruba. Mundo berdad a brasa Aruba e tempo ey y e por a haci un trabou grandi di crea un legacy grandi pero el a traiciona Aruba. E hecho ta cu e no tabata tin ningun vision y nos no por mira tampoco producto di ningun vision”, Prome Minister a bisa.
Prome Minister Evelyn Wever-Croes a duna su conclusion riba ful e betoog di Parlamentario Eman bisando: “Señor Eman a duna su definicion di kico ta metemento politico den companianan estatal pasobra el a bisa akiden cu el a forsa su ideanan riba Web apesar cu WEB no tabata carg’e. El a pone e experticio di WEB un banda pa el a logra papia di green green na 2020. Esaki no a wordo sosteni y esaki ta metemento politico.
Señor Eman a papia cu Aruba tabata un brug pa Hulanda, esaki ta berdad na momento cu Aruba a haya un KB riba su cabes na juli 2014 y esaki ta keda su corona, su legacy, su trendsetting. E por a lolgra un legacy hopi mas bunita si e tabata tin un miho vision, curashi, determinacion y curason p’e pueblo aki di berdad”.
