ORANJESTAD(AAN)—Un siman despues cu otro rapport a sacudi Aruba, Mike Eman a bolbe presenta su mes pa bolbe trata na destrui e confiansa di Pueblo den nos sistema electoral cu no ta depende di Gobierno Evelyn Wever-Croes.
E acusacion di Mike Eman ta sumamente serio.
Pa un acusacion, sinembargo, tin peso, mester mira kende a presenta e acusacion.
Pa yega na un conclusion pues di e importancia di e acusacion, nos mester uza Mike Eman como midi, pa mira na ki momento por papia di fraude, di estafa.
Tambe nos mester busca e nificacion di e palabra fraude, cu segun interpretacion legal ta un engaño intencional pa haya beneficio ilegal.
E hecho cu eleccion ta tuma luga na 2021, ta basa riba ley cu ta dicidi cu mester tin un eleccion cada cuatro aña. Un Gobierno no por sinta mas, a menos cu e bolbe haya autorisacion den eleccion liber.
E eleccion a wordo adelanta a base di e hecho cu Gobierno mester a bay cas y no por reforma e gobierno actual, cu Evelyn Wever-Croes a forma na 2017 pasobra Mike Eman no tabata kier a forma un gobierno.
Si Gobierno mester a bay cas ta pa motibo cu tin un investigacion penal cu ta mishi cu Alan Howell, cu mester duna sosten na Gobierno Wever-Croes como miembro di e partido POR cu ta den un crisis di existencia.
Si Prome Ministro Wever-Croes pa mantene gobierno bibo te eleccion, a mantene sosten di Howell, nunca mas Prome Ministro Wever-Croes por a papia di honestidad of integridad.
Pues eleccion adelanta ta di acuerdo cu nos sistema legal, cu si ta habri pregunta importante ora papia di Mike Eman!
Awe cu Mike kier uza fraude pa destrui confiansa den resultado di eleccion, nos mester puntra nos mes si Mike no a comete fraude electoral ora na 2009 el a uza reduccion di belasting, sin presenta un opcion pa na otro forma Aruba keda cu e entrada cu e mester pa cubri su gastonan.
Mike a comete fraude ora el a convence Pueblo cu por kita mita BBO, cu e tabata sa cu lo a destrui Aruba? Mike no a studia e materia y Raad van Advies mes a descualifica su argumentonan!
Mike a gana eleccion na 2009 y a baha BBO cu mita contra conseho di consehero oficial di Gobierno y Aruba a cay den e desaster financiero!
Mike a comete fraude electoral na 2009? Mike a comete fraude electoral na 2013 ora e no a presenta e realidad di situacion financiero na un Aruba, cu el a haci kere cu Hulanda no tabata tin motibo pa acusa di mal maneho financiero.
Mike a comete fraude cu Aruba ora el a pone Pueblo kere loke no ta cu su estadia di Fort Zoutman cu welga di hamber pa sconde cu el a destrui Aruba?
Mike a comete fraude ora el a firma un acuerdo cu Nicolas Maduro sin aprobacion di Parlamento?
Refineria di Aruba a wordo institui. Tabata tin fraude den refineria di Aruba, cu manera DIARIO a adverti ta un poz cu mal holor?
Mike a bay eleccion na 2017 y 8 Mil persona a vota pa Mike drenta Parlamento. Mike a keda afo sin motibo. Mike a comete fraude door di haci su votadonan kere cu e ta dispuesto na drenta Parlamento, cu ta loke nan a vota pe?
Awe Mike ta bolbe presenta su mes mientras Husticia ta tras di varios hende di su partido. Sin prueba, Mike ta papia di fraude obviamente pa e haya voto.
Nos mester papia di Fraude den caso di Mike Eman? Di kico nos mester papia ora nos papia di 1.6 Miljard cu Mike a spart di trahadonan di Aruba?
Ora papia di fraude, mester mira Mike nos dilanti????
Nos ta laga e conclusion di Mike y fraude na limguistanan cu mester splica tambe si por yama un hende riba su mes fraude, estafa. Pasobra tin hende na mundo cu ta pone bo pensa cu nan a nace fraude cu cara di angel, mientras nan ta pirata!
