Minister Ursell Arends tin razon cu no ta trata di un problema di awor --- Serlimar mester tabatin prioridad den un 1.6 Biyon pa infrastructura --- Futuro di un compania esencial pa comunidad mester wordo regla
ORANJESTAD(AAN)- Atrobe personal di Serlimar ta welga. Minister Ursell Arends tabata tin razon cu e forma cu el a atende e ultimo accion na Serlimar, cu porfin mester haya atencion structura.
Na momento cu personal di Serlimar a drenta den accion, comunidad a haya su mes confronta atrobe di tur e resultadonan cu welga na un compania esencial pa bienestar di Aruba ta nifica.
Mester papia aki di un compania, cu un tarea importante den un comunidad manera e prioridadnan mundial ta trece dilanti.
Serlimar ta ocupa su mes cu medio ambiente, cu hende ta afecta pero cu tambe tin resultado directo pa salud di poblacion y tur loke no solamente hende, famia y trahador mester pero henter un comunidad mester pa por funciona.
Aunke hopi bez Serlimar ta wordo limita solamente na recoge sushi como algo di menos balor pa un comunidad, ta hustamente su funcion di percura directamente pa sanidad di un Pueblo, ta duna importancia na e compania pero tambe tur loke mester ta funciona bon pa comunidad por sigura un medio ambiente di calidad.
Pa sostene e pensamentonan di DIARIO con mester atende cu Serlimar y pa sostene e decision di Ministro Ursell Arends cu aki ta trata di un toro cu mester coy na cacho, DIARIO a bolbe den historia gubernamental di Aruba y sigur na e momento cu na e momento cu Mike Eman a proclama e proyecto “Bo Aruba”.
Na un forma unico e mayoria den Parlamento, cu tabata sostene Gobierno Eman, a entrega Mike Eman e suma di 1.6 Biyon cu Mike lo mester a gasta pa drecha infrastructura di Aruba.
Kico ta infrastructura? Con den un fondo di 1.6 Biyon pa infrastructura, no a inclui un renobacion total di Serlimar?
Ora ta papia di infrastructura di un pais, sigur mester papia di Serlimar cu no solamente ta recohe sushi pero ta percura pa e ambiente cu ta na interes directo di bida di e Arubiano, economia cu mester produci trabou y entrada pa e Arubiano.
Ora papia di bon funcionamento di un compania, su trabou mester duna resultado pero tambe (sigur como compania di Pueblo) mester sigura bienestar di e trahador.
Con den e totalidad di proyectonan di Bo Aruba, cu mester a mehora e base di comunidad, no a inclui upgrading di Serlimar?
Parti di 1.6 Biyon mester a bay sigur pa Serlimar y no pa fiestpad, tram, fontein y tur loke Mike Eman a uza pa ciega Aruba.
Un solucion mester wordo alcansa pa Serlimar y mester atende cu personal y tur loke ta resorta bou Serlimar cu ta responsabel pa e medio ambiente, cu mester proteha hende den e menasa di cambio di clima.
1.6 Biyon pa infrastructura na inicio di Siglo 21, cu a bira e siglo pa pone mundo den e balansa na bienestar di e ser humano, mester a incorpora placa pa tur loke awe ta wordo trece dilanti pa por resolve problemanan di Serlimar.
No ta prome biaha cu personal a protesta y a presenta nan problema pero tambe problema di henter Aruba.
Na 2016 por mira con Alan Howell como coordinador di Ministro Mike de Meza di AVP, a bisa cu Gobierno di AVP no a reserva placa pa e problemanan mas grandi di Serlimar den e presupuesto di 2017.
Por mira con na 2017 Benny Sevinger y Mike de Meza como Ministronan di Gabinete Mike Eman, a bisa trahadornan cu nan lo no perde nan trabou mientras Gabinete Eman a baha sin laga placa atras pa atende cu e realidad di Serlimar.
Si for di 2014 ya ta topa cu problemanan na contratistanan di Serlimar, cu Gabinete Mike Eman a laga atras den desastre, cu a continua durante e epoca di Otmar Oduber sigui pa e epoca di Marisol Lopez-Tromp, cu a tira e bom di Serlimar pa Prome Ministro Evelyn Wever-Croes na final di 2020.
Prome Ministro Evelyn Wever-Croes mester a evita cu e bom ta rementa na final di su prome gabinete y awe Gabinete Evelyn Wever-Croes mester busca un solucion.
DIARIO lo sigui tur desaroyo pasobra problema na Serlimar lo afecta turismo, lo afecta tur industria, lo afecta tur trahador, henter comunidad, cu a entrega Mike Eman 1.6 Biyon pa drecha e infrastructura di Aruba den cual Mike Eman a pone fiestpad y un tram como prioridad!
