Segun Magaly Brito, Secretaria General SEPPA:
ORANJESTAD (AAN) – Secretaria General di SEPPA, Magaly Brito, no ta spera cu mester yega asina leu cu atrobe empleadonan publico y trahadornan di fundacionnan, mester ta riba caya pa demostra riba e hecho cu gobieno ta kita condicionnan di trabao for di nan, cu na e momentonan aki ta hopi importante.
“Empleadonan Publico y Trahadornan di Fundacion tin diez aña sin haya un ahuste di salario debi na aumento di costo di bida. Ha haci tur intento pa negocia esaki na mesa y cada biaha ta mesun historia. Tin historia cu no tin placa, manera nan ta bisa ‘ta hisa gastonan di personal’, Aruba tin mucho debe, tin cu cumpli cu Hulanda; pero, di otro banda, e empleadonan publico nan cartera si a grita na 2008, aworaki casi ta disolve den nan saco. Esey, mi ta kere, mas bien e dunador di trabao tin cu sinta na mesa y wak con pa alivia e dolor grandi cu empleadonan publico tin den nan cartera, y hunto cu esaki, e trahadornan di fundacionnan, cu tin e mesun situacion: nan salario ta para pa diez aña largo.
No tin nada tocante esaki. Gobierno constantemente tin discusionnan riba e Landspakket, caminda cu esaki mester tuma lugar, y e tema di ‘prestatie management’ cu cada biaha gobierno kier preta e trahadornan hopi mas, y na mesun momento no tin nada pa nan.
“Atrobe mi ta reitera cu e ‘prestatie management’ ta algo cu nos ta kere den dje, den un evaluacion husto y pa e trahadornan, pero e mester bin a cambio di algo, y esaki por mire, claramente, cu no tin. Lo unico cu nos ta premira ta cu e evaluacion aki por termina na mas medida pa e trahado cu consecuencianan hopi grave, pero di otro banda cu nan lo mira algo den nan entrada, esey no tin algo riba mesa, na e momentonan aki”, Magaly Brito a bisa pa conclui.
