Pa Miguel Jose Mansur: “Les jeux faits” den politica - Gobernacion mester bira derecho exclusivo di grupo privilegia - Miguel Jose Mansur kier pone fin na sistema democratico na Aruba
ORANJESTAD(AAN)- Kico tin tras di Miguel Jose Mansur? Esaki ta e pregunta cu hopi Arubiano a haci nan mes, ora Miguel Jose Mansur a presenta riba e plataforma politico di Aruba na 2020.
Cu cantidad di aspirante lo a presenta nan mes na 2020, no ta nada nobo pa personanan conoci cu politica y cu ta na haltura cu e situacion cu Covid-19 a crea despues di e crisis financiero di Aruba, lo a habri porta pa cantidad di cara nobo presenta.
Kico agenda di tur cu a subi plataforma politico na 2020 na forma sorprendente tabata, a keda un pregunta.
Miguel Jose Mansur a splica con el a bandona e ceronan halto, rondona cu nubia, di Suisa y cu e ta sinti su mes yama pa goberna Aruba.
El a forma un partido hunto cu e ex Miembro independente di Parlamento, Daphne Lejuez entre otro. Esaki sigur a haci cu el a haya un sosten importante, cu a cay ora directamente despues di eleccion, Daphne Lejuez a retira su sosten na Miguel Mansur mescos cu tabata e caso cu otro candidatonan di Accion 21.
Un suceso historico pa Aruba, cu a mira con den Parlamento tin un partido representa pa Miguel Jose Mansur, cu no por permiti su mes e luho pa retira di Parlamento hasta pa enfermedad serio, pasobra na momento cu e mester tuma su retiro, Daphne Lejuez lo podera di e asiento cu votonan di Lejuez a yuda Mansur logra.
For di debate politico organisa pa Camara di Comercio prome cu eleccion 2021, tabata tin hopi critica riba e actitud di Miguel Jose Mansur cu na un forma sumamente “fuerte” a ataca e persona di Prome Ministro Evelyn Wever-Croes.
Kende realmente ta Miguel Jose Mansur y kico por spera di su persona, ta un pregunta cu Arubiano ta haci nan mes y ta completamente di acuerdo cu e sistema democratico di Aruba, cu Miguel Jose Mansur mester representa y respeta.
Ayera un bom a rementa na Aruba na momento cu Miguel Jose Mansur a lansa e idea cu e lo presenta awe oficialmente den Parlamento, cu pa un persona bira Ministro na Aruba e mester ta por lo menos un graduado HBO, pues un academico, loke ta mishi directamente cu e base di democracia.
Topico ayera na Aruba tabata e intencion di Jose Miguel Mansur pa awe propone den Parlamento, cu solamente e grupo privilegia cu tin un diploma HBO por goberna nan pais.
Esaki ta hiba Aruba atrobe na e principio di realesa compo gobernante absoluto, di cual democracia a deshaci.
Si mira e historia di e proceso electoral di Aruba, ta mira con democracia a deshaci di e situacion den cual solamente hende cu cierto grado di educacion of cu cierto entrada por a vota pa yega na eleccion general.
Gobernantenan no por wordo eligi a base di nan fortuna, nan descendencia of estudio cu nan a sigui.
Pa Aruba e thesis di Mansur ta peligroso mas ainda despues cu ta e grupo inteligente di AVP, a percura pa Aruba haya su mes cu un debe nacional, cu debenan PPS, cu un desaster financiero y economico causa pa fantasia di Citgo.
Ayera alarma a wordo bati na Aruba contra e situacion cu awe por spera den Parlamento ora Miguel Jose Mansur a pone su cartanan riba mesa.
“Les jeux sont faits” ta e palabranan Frances cu ta indica cu awor tur carta ta riba mesa.
Miguel Jose Mansur, cu a drenta Parlamento cu ayudo di sosten di personanan cu ya a bira lomba pa su persona, kier cera porta pa Arubianonan cu no ta di su grupo privilegia, academico.
E pregunta di ayera tabata, kico ta e proximo paso di Miguel Jose Mansur y kico su agenda realmente ta!
