ORANJESTAD (AAN): Recientemente, e conocido artista local Miguel Genser, a presenta su produccion di mas nobo, cual ta e cantica cu yama 'Speransa'.
Miguel ta bisa: "Cu un sentimento di gratitud, cariño y hopi honor, mi kier humildemente presenta na boso cada un, mi produccion di mas nobo pa 2022.
Ta casi 4 aña desde cu mi a produci algo pa mi mes. Mi ausentismo parcialmente a bay debi na enfoke / produccion di otro artistanan y gruponan musical.
Awe mi kier regala boso un otro cancion original di mi persona cual mi a skirbi 2 luna pasa titula: "Speransa". E ta produci pa mi persona hunto cu Maikol Lugo.
Dia 27 di December ultimo, e saca un 'lyrical videoclip' di 'Speransa', produci pa e talento Argentino; Paul "Alfie" Garcia.
Aunke e ta un cancion cu lo mi desea di promove januari 2022, mi a scoge concientemente pa saca e tema prome cu e aña bolter, pa asina purba contribui, pone mi "granito de arena" pa tur esnan pasando den necesidad, cu tin mester di speransa y asina kisas encontra motivacion, claridad, positivismo, direccion y felicidad atraves di mi musica pa e temporada y e aña venidero.
Ohala cu mi musica por hasi un impacto riba cada un di boso, tanto di forma personal como tambe laboral y cu boso por yuda mi transmiti e ola di mensahe positivo aki na cada skina di nos pais Aruba y tambe na nos hermana isla Curacao y Boneiro.
Cu Dios bendiciona cada un di boso ricamente y mi ta desea boso tur un temporada di fin di aña y un cambio pa 2022 yena di felicidad, salud, paz, positivismo y hopi speransa!", Miguel Genser a expresa.
