Luenne Gomes-Pieters, directora di DIMP:
ORANJESTAD (AAN)—Directora di Departamento di Impuesto, Luenne Gomes-Pieters a comenta den entrevista cu DIARIO, cu e ta contento pa mira cu tin interes riba yudanza, ora di yenamento di formulario di Inkomstenbelasting.
Gomes-Pieters a indica cu esaki ta ultimo formulario cu ta den forma di papel, y DIMP mester bay asesora kico nan ta bay haci cu e formulario aki, den futuro, y sigur teniendo cuenta cu nan tin un grupo grandi di contribuyente cu ta prefera di yena esaki na man.
“Nos a cuminza digitaliza. Ya caba pa 2017 nos a cuminza cu e fase di digitalizacion di nos procesonan administrativo, y e formularionan tambe tabata parti di esaki. Na Mei ultimo, nos a laga e formulario di Winstbelasting bay live unda cu e contribuyente cu tin cu paga esaki, awor den nos sistema, nos portal digital ta entrega nos formulario, y nos ta ripara cu nos pensionadonan kier un ‘tailor-made approach’. Hopi biaha como feedback nan kier papia cu un hende cu no kier wordo atendi via telefon, nan kier pa un hende splica nan kico ta e cobranza. Ora di cera un areglo di pago, nan lo kier tin e areglo di pago den nan man, pa nan controla, y nan ta un di e prome contribuyentenan cu ta den rij prome, pa nan cumpli. Na momento cu nos ta habri porta pa pago di plachi number, nan ta e promenan para den rij”, Luenne Gomes-Pieters a expresa.
Directora di DIMP a comenta cu nan a wordo acerca door di OPPA. “Señor Valdez a acerca nos pa cierto tayer cu nos a duna na su miembronan, tocante con pa yena e formulario di Inkomstenbelasting, kico ta e cambionan pa e pensionadonan, kico nan por verwacht den futuro, kico ta e reglanan ora ta trata areglo di pago, pasobra cu nos a pasa door di un inhaaslag basta grandi unda cu e pensionado cu tin cu paga e impuesto di AZV di tur aña, a haya diferente cobranza tras di otro, y nan tabata preocupa cu nan entrada, cu nan tin como pensioen, y e debenan di impuesto cu nan tin, ta mas halto cu nan entrada, pues ki flexibilidad DIMP por duna” Luenne Gomes-Pieters a señala.
El a agrega cu DIMP tabata tin varios sesion interesante cu nan, y djeynan a nace otro necesidad unda cu OPPA a bisa cu nan miembronan tambe lo kier haya ayudo pa yena e formulario di Inkomstenbelasting, y e ora ey a duna un training na esnan cu kier a forma parti di e ekipo di DIMP, y nan a hacie hunto.
