Errol de Freitas, presidente di SNBA:
ORANJESTAD (AAN) – Errol de Freitas, Presidente di San Nicolas Business Association (Asociacion di Comerciante di San Nicolas), a elabora den entrevista cu DIARIO, tocante Secrets Hotel cu ta den desaroyo, cu e meta di habri na aña 2024.
De freitas a referi na un encuentro cu di manera interesante a tuma entre SNBA, representantenan di New York, y tur e desaroyadornan di e proyecto na San Nicolas, cu tambe a atende cu e encuentro aki, den cual tabata presente e director di e proyecto di Secrets, señor Alejandro Murcia y cu a keda combersa hopi rato cu SNBA.
SNBA a pidi nan pa bin Aruba y conta e pueblo di pariba y e miembronan di SNBA, con pa prepara pa ora e hotel habri su porta, loke ta planea pa aña 2024 banda di e temporada di “Thanksgiving”, unda nan lo habri nan 600 camber.
E idea ta pa nan sinta cu e miembronan, pueblo di San Nicolas y comercio, pa nan prepara pa ricibi e hotel aki, y kico e comerciantenan por prepara nan mes pe tambe pasobra nan ta bin duna un idea di e profile di nan propio guestnan, segun de Freitas a bisa. “Mi ta na spera di esey y si tur cos bay bon, nos ta bay tin un reunion cu e miembronan na cuminzamento di Juni”, Errol de Freitas a señala.
El a menciona tambe cu SNBA a pidi gobierno pa no drecha e area di Baby Beach y Colony pa un total, pero haci’e pa e pueblo di Aruba. Pueblo di Aruba ta esun cu mester bira satisfecho, cu locual e ta bay bira.
“Naturalmente, e turistanan tambe lo ta parti di esaki, pero manera por mire tin un tekort riba e beach, y mester cay cierto decisionnan na bentaha di esaki”, de Freitas a señala.
