ORANJESTAD (AAN): Presidente di e Fundacion Mi Voz Ta Bo Voz, Lisette Gomes a anuncia diahuebs den un conferencia di prensa
cu nan ta bay inicia dos proyecto. Un di nan ta e campaña di 'Back to School' cual tin como meta pa yuda rond di 500 mucha.
Banda di esaki, nan lo cuminsa cu un proyecto di prevencion. E proyecto no ta completamente cla ainda, pero kier a present'e na comunidad pa informa riba e problematica di abuso sexual di mucha, cual ta uno hopi na halto den nan lista.
Gomes a indica cu nan ta un di e fundacionnan cu kier wak e parti preventivo y pa cu esaki nan ta trahando riba e proyecto cu yama 'Respeta Mi Curpa, Respeta Mi No!'.
Ta bay siña e muchanan e nombernan corecto di nan partinan priva, pero tambe con nan por cuida nan mes y con nan ta bay pone adultonan respeta nan y asina evita pa nan wordo mishi, Lisette Gomes a remarca.
Esaki ta un proyecto internacional. Tin e indjannan Jira y Taino, cu nombernan di descendiente di Indjan cu tabata den Caribe y Aruba den pasado.
Jira y Taino tin nan paña bisti, pero tambe por kita nan paña pa asina por bay mustra nan e nombernan corecto di nan parti priva.
Esaki ta pasobra a haya casonan unda mayornan ta siña e muchanan nombernan incorecto y ora e mucha wordo mishi y ta entrega un keho, e ta bay menciona por ehempel, flor y flor por ta un coi hunga, un flor di berdad locual ta trece confusion.
"Nos muchanan mester por indica kico ta exactamente e nombernan di nan curpa", a enfatisa.
Gomes a agrega cu e proyecto aki ta bay ta uno hopi bunita. E fundacion ta buscando 'samenwerking' na Aruba mes cu otro instancianan pa uni forsa y mustra cu si tin prevencion na Aruba mirando cu e prevencion no ta asina grandi manera cu kier pa e ta.
Na Aruba a enfoca hopi riba e parti curativo y na e momento ey ta laat caba pasobra tin un mucha abusa, trauma cu no lo funciona manera mester ta den comunidad, e presidente di e fundacion a remarca.
E proyecto aki lo yuda e muchanan pa ta muchanan fuerte y cu sa kico nan derechonan ta y con nan por defende nan mes, pero banda di esey bay conta un hende cu nan ta confia, a bisa.
