Mike Petronia: *’Un menor di edad por haya un castigo halto’
ORANJESTAD (AAN): Desde cu algun tempo atras yiu muher di Mike Petronia, Sayuri, a wordo asesina, e ta buscando husticia pidiendo pa esnan responsabel haya un castigo mas halto.
Diaranzon mainta e famoso DJ a tene un conferencia di prensa dilanti di corte pa mustra riba e hecho cu e castigo cu por wordo exigi pa e tipo di crimen aki cometi pa un menor di edad por ta mas halto.
“Mi a yama e conferencia di prensa pa pueblo sa cu cos por ta diferente”.
Awe mi ta bin cu prueba den mi man pa tur hende sa cu cos por ta diferente.
Un menor di edad por wordo huzga como un mayor di edad, dependiendo di gravedad di e caso, segun Petronia kende a presenta un documento na prensa, cu ta un articulo cu publica den un corant Hulandes cu ta mustra con un hoben di 17 aña na Hulanda a ricibi un castigo di prison di 12 aña, siendo cu apenas e tabata chauffeur den un caso di asesinato.
El a splica cu OM a exigi un castigo di 20 aña pe y el a haya 12 aña di prison.
“Esaki nifica cu tin prueba cu un castigo halto por wordo duna na un menor di edad, dependiendo di gravedad di e caso”.
Den mi caso ta mata nan a mata mi yiu muher, pues e no ta djis un caso chikito.
Si acaso e dos personanan aki haya 4 aña, esaki ta un inhusticia, segun Petronia.
El a bisa tambe cu Diaranzon mes un di e acusadonan a cumpli 18 aña.
“Mi kier husticia den e caso di asesinato di mi yiu muher y si ta posibel e acusadonan mester haya bida largo mes den prison”, segun tata di Sayuri.
El a splica cu na dado momento el a entrega un carta na Gobernador di Aruba y no a haya un reaccion y mescos a pasa ora cu el a bay Hulanda pa entrega un carta na Prome Minister Hulandes.
“Si mi tin cu bay VNO mes pa entrega un carta na e Rey lo mi hacie y mi ta bezig cune caba”.
Mi kier pa e wak e inhusticianan cu ta pasando y pa wak si e por tuma medidanan, pasobra no ta paso bo tin 17 aña bo ta haya simplemente un castigo di menor, siendo cu ta trata aki di un caso di asesinato.
Awe ta mi yiu, pero mayan por ta yiu di cualkier otro persona, segun Petronia.
“Mi no ta bringando pa mi yiu so, sino pa tur teenager y tur otro hende cu ta den e tipo di caso aki”, segun e tata preocupa.
