Otmar Oduber a bisa di forma contundente:
ORANJESTAD (AAN) – Ex-minister Otmar Oduber a menciona den conferencia di prensa, cu e decision di Huez Hof, di duna razon na Aruba Bank ta nifica cu: 1. Cu e tin cu cera su negoshi; 2. Cu e tin cu bende su negoshi; 3.Of cu e tin cu cera ya bay for di Aruba.
“Mi no ta bay for di aki pasobra ningun hende por saca mi di mi pais. Ni un Hulandes, un macamba ni ningun organizacion cu ta kere cu nan por persigui, politicamente, hendenan di un pais y ta kere cu nan ta bay vence Otmar aki na Aruba,
NO! Mi negoshi lo tin cu cera, of wordo bendi, of mi negoshi ta bay failliet. Y na e momentonan aki, bende un negoshi bao e circumstancianan cu mi ta, ta dificil! Ken ta bay tuma un negoshi si e doño ta bay wordo investiga, of persigui, manera ta sosodiendo na e momentonan aki.
Cu esaki lo nifica cu Otmar lo bay failliet ‘so be that’, pero mi ta keda akinan y mi ta keda bringa e caso ski te na final. Loke ta tumando lugar akinan no ta husticia; no ta imparcialidad den husticia. Ki casualidad cu ta dura dos aña y mey pa Hof dicidi riba e caso aki di Aruba Bank, y diripiente un otro hof, pasobra a dura dos aña y mey cu Aruba Bank a apela di nobo, bolbe cuminza un otro caso den Hof; tin dos aña y mey cu Hof no a duna su veredicto,
ta cuminza un caso dos luna pasa, despues di a warda dos aña y mey pa tuma un decision riba e mesun dia, cu mi a entrega un protesta contra e citacion unda cu nos a trece tur prueba dilanti, Hof ta bisa cu e no por tuma un decision pasobra e caso aki nan a pint’e asina grandi, nan a busca asina hopi vruminga hunto pasobra bo tabata tin un olifante riba Otmar, cu nos no por den un caso di Hof si nos ta libera bo si, of no. Ki casualidad! Mi kier keda pensa ‘ki casualidad’ pa mi no pensa otro di nos sistema hudicial”, Otmar Oduber a remarca.
