Prof. Peter Nicolaï miembro di Eerste Kamer pa PvdD
ORANJESTAD (AAN): Informacion direct for di Hulanda, ta indica cu Professor Nicolaï a expresa cu el a mira hopi adelanto den e forma di dialoga otro durante di e reunionnan Interparlamentario di Reino (IPKO). Prof. Nicolaï a expresa cu a sinti menos bataya entre e islanan y Hulanda, y den e reunionnan a pone hopi atencion na e posicion di e islanan. Por ehempel aspectonan tecnico, huridico y e autonomia di e islanan.
Den cuadro di esaki ta hopi importante locual Raad van State a expresa, prof. Nicolaï a indica. El a ripiti locual cu Raad van State a bisa: ora ta trata un consensusrijkswet, e palabra consensus ta nifica cu hunto bo ta di acuerdo. Esey ta nifica cu como pais bo mester percura pa realmente bo ta di acuerdo hunto. Pues si e consensusrijkswet mester wordo realisa, e Parlamento di e pais mester ta di acuerdo cu ne.
Prof. Nicolaï a sigui splica cu si e mira e situacion cu Aruba ta den dje cu su experiensia como hurista, e ta di opnion cu e ley no ta bon “het deugd niet”. Pasobra den dje ta stipula cu e Parlamento di Aruba den caso cu nan haci un cambio di nan Landsverordening riba por ehempel supervision financiero, e ta wordo prohibi na nan gobierno pa enforsa esaki. Pues bo ta haya un pais cu su mesun “wetgevende macht”, un Parlamento cu ta bisa nos kier cambia algo, pero tambe un consensusrijkswet cu ta bisa cu bo no por ehecuta e cambio aki. Ademas e ta bisa cu e no por imagina su mes cu un mayoria di Parlamento di Aruba ta bay di acuerdo pa firma un ley den cual ta stipula esaki.
Mescos cu Prof. Nicolaï ta opina esaki el a indica cu e ta pensa cu mas Parlamentario lo ta pensa mescos. Sinembargo e ta mira e importancia di di e tema cu riba su mes e ley aki ta un punto final di algo cu ya pa hopi tempo ta wordo trata door di diferente gobierno.
Pa conclui prof. Nicolaï a indica cu riba su mes e solucion cu tin den e ley ta acceptabel, pero tin algun texto cu mester sali afo. Pasobra los di politica of ken ta na mando, realidad ta cu mester bin un solucion pa e debenan cu tin.
