Secretario di Estado van Huffelen:
ORANJESTAD(AAN): “Aruba dushi tera, pami ta un gran honor pa traha hunto cu boso na bienestar di e pueblo”, tabata e prome palabranan di Secretario di Estado Alexandra van Huffelen durante un conferencia di prensa Diahuebs atardi.
E Secretario di Estado tabata na Aruba pa un bishita di 2 dia y durante e conferencia di prensa el a bisa cu e ta contento di ta aki na Aruba.
El a splica cu e prome contactonan digital tabata placentero, pero pa por wak otro den wowo y papia cu otro dilanti di otro naturalmente ta mas mihor.
“Den e dianan cu a pasa mi a wak hopi di e bunita pais aki”.
Mi a papia cu Prome Minister den Ministerraad y den Staten y tambe mi a bishita Casa Cuna pa tende di nan trabaonan importante pa mucha y mamanan teenager, segun van Huffelen.
El a indica cu el a papia tambe cu Anouk Balentina riba e problemanan na Parkietenbos, mientras cu el a disfruta di e arte briyante na San Nicolas y na e ateliers.
“Mi a papia tambe riba proteccion di naturaleza y naturalmente cu empresarionan riba e estado di economia y con esaki por bira mas fuerte”.
Tambe hunto cu Prome Minister mi a hiba combersacion cu e sindicatonan.
Mi tabata aki specialmente pa scucha y pa tende kico ta e soñonan, e necesidadnan y e preocupacionnan di e Arubianonan, segun e Secretario di Estado, kende a indica cu e ta realiza cu tin hopi trabao pa haci.
El a sigui bisa cu tin hopi trabao pa haci riba tereno di enseñanza, mercado di labor, naturaleza y clima.
“Manera Prome Minister a bisa, Corona a afecta Aruba bastante y pesey ta importante pa para cla pa yuda, esey nos ta haci y nos lo sigui haci esaki si ta necesario”.
Sinembargo, den tur honestidad, prome cu e tempo ey tabata tin problema caba.
Nos a haya nos mes confronta cu un debe creciente, debi na falta di eficiencia di gobierno y e problemanan ey naturalmente a bira mas fuerte debi na Corona.
E problemanan mester wordo resolvi, pero esey no lo logra cu solamente recuperacion di turismo, segun van Huffelen, kende a sigui bisa cu pesey ta importante pa Aruba sigui cu reformanan y cu Hulanda kier yuda den esaki.
“Mi ta un persona cu no gusta haci promenan cu cual mi no por cumpli, pero mi ta hopi motiva pa hunto cu Aruba y Arubianonan cuminza traha cu curazon y alma riba un bunita futuro”.
Esaki basa riba un relacion igual, manera gobierno di Hulanda a bisa.
Cada pais ta un parti igual balora di Reino.
Mi a tende kico ta e soñonan y mi kier traha pa realiza esakinan, segun e Secretario di Estado.
