MAICAO: Ta hopi ingenioso pa mira kico hendenan den servicio di narcotrafico ta haci pa busca forma creativo pa transporta droga sin cu ta hala atencion di autoridad.
Polis a descubri un cargamento di tankinan industrial pa paga candela, den cual tabatin mey ton di marihuana scondi.
E biaha aki, e narcotraficantenan a saca tur substancia quimico pa paga candela, y na su lugar a hinca rolnan largo di como 3 duim hancho, y largura di 25 te 30 centimeter, cu asina por a drenta via e buraconan di entrada principal di e fire extinguisher.
E rolnan largo aki tabata yena cu marihuana comprimi. E delincuentenan a logra hinca den ocho tanki di paga candela, un total di 1.066 rol yena cu e asina yama ‘Super Marihuana’, conoci tambe como creepy. E rolnan tabata comprimi pa logra menos volumen y mas peso, pues ora cu a pone e cantidad di rol riba machine di peso, esaki a yega na 552,5 kilo.
Segun Polis a investiga, e marihuana aki a sali for di Cali y tabata bayendo pa beachnan di Alta Guajira, cu ta situa apenas algun kilometer pabao di isla di Aruba, unda nan lo mande sea pa paisnan di Centro America of Caribe of Venezuela.
E droga a wordo haya riba e caminda entre Palomino y Riohacha. Ta trata di un truck blanco cu tras di stuur e homber Carlos Andres Henao Rojas di 38 aña, kende a wordo deteni.
Polisnan mes na comienzo ora di a check e peso, a purba hisa un di e tankinan aki y a keda sorprendi pa e peso. E ora a pensa cu algo no ta bon, y a dicidi na haci un investigacion riguroso y asina a descubri e marihuana scondi aden.
Polis di Colombia a indica cu e accion aki, nan a logra di dal e red di narcotrafico un golpi duro, pasobra e marihuana aki tin un balor riba mercado ilegal di 138 miyon Pesos.
Na La Guajira, Polis a bin ta intercepta e aña aki caba como 4.604 kilo di droga, cu ta 2.219,2 kilo di cocaina, 2.377,2 kilo di marihuana, 4,8 kilo di base di coca, y 2,8 kilo di bazuka.
