ORANJESTAD (AAN) – Na December 2018, e proyecto “From Teenage to Life Coach” a cuminza. Asina señora Mirugia Locadia-Zink,
Vicepresidente di Fundacion ADRA Aruba, a menciona pa cuminza su discurso, en ocasion di e graduacion 2022, Diaranzon ultimo.
El a splica cu e meta di e proyecto aki ta pa duna e mayornan hoben un segundo oportunidad y pa guia nan den nan desaroyo personal.
“Durante e trayecto, e mayornan hoben ta ricibi hermentnan cu lo yuda nan regresa den nan bida di studiante, den mundo laboral, of habri nan propio negoshi. Den e proyecto aki, e mayornan ta ricibi curso practico of teoretico. E materianan practico ta cosemento, obra di man, beyesa, manicure y pedicure, cushinamento. Esnan teoretico ta Administracion, Salud Mental, M.P Emocional, Mayor y Yiu, Etica y Protocol”, señora Locadia a menciona.
El a agrega cu pa haci e cursonan mas accesible, e fundacion ta ofrece cuido pa nan yiunan, transporte y cuminda cayente. Tur esaki sin costo algun.
Edad pa participa den e curso aki ta di 14 pa 21 aña, y tin biaha tin excepcion. “Esun di awe ta nos di cuater edicion y nos ta agradecido na tur organizacion y personanan cu a duna nan aporte, den un of otro manera, pa e proyecto aki por sigui cristaliza. Nos ta spera cu boso por sigui yuda nos pa nos por sigui yuda nos mayornan hoben, pa duna nan un educacion cu nan por ta un modelo pa otronan”, señora Locadia a conclui.
