Docter Joaquin van Trigt:
ORANJESTAD (AAN): Docter Joaquin van Trigt, President di Asociacion di Docternan di Cas (HAVA), ta elabora riba e lansamento di protocolnan di coordinacion di cuido entre Docternan di Cas y Specialistanan. Na juli 2023, a cera un convenio entre Hava y Asociacion Specialista Hospital di Aruba (ASHA) pa asina intensifica colaboracion entre docternan di cas y specialistanan. Algun protocol a wordo cera den diferente area di specialisacion.
Den un encuentro cu prensa hunto cu Minister di Salubridad Publico, Marvin Wyatt Ras, a anuncia oficialmente cu e protocolnan ta disponibel riba ambos website di e dos organizacionnan aki. Docter van Trigt a remarca cu e protocolnan ta delinea cierto acuerdonan cu e dos organizacionnan a haci pa e cuido medico primario of basico cu ta cay bou di docternan di cas y e cuido secundario, cu ta esun mas compleho y ta cay bou di specialistanan. Pa e di dos aki, pashentnan mester un verwijsbrief di nan docter di cas.
Docter van Trigt ta indica cu na momento cu e cuido di un pashent bira mas compleho y un docter di cas ta ripara cu e caso ta complica, e ta traha un verwijsbrief pa un specialista pa tratamento mas intensivo. Bou specialistanan ta cay: urologia, pulmonologia, nefrologia, cardiologia, ortopedia, oftamologia y medicina interno.
Segun docter van Trigt, un di e metanan mas importante di e protocolnan, ta pa evita e lista di espera na e specialistanan di pashentnan cu ta bin di mas di 50 docter di cas y atende pashentnan cu specificamente tin un condicion cu ta cay bou di e cuido di specialistanan. Cu esaki por sigura cu e docter di cas ta trata cuido basico di pashentnan, y e specialista ta trata solamente e cuido necesario y ora tratamento caba, e ta manda e pashent bek pa docter di cas y ta traha luga pa otro pashent cu mester atencion di un specialista.
Comunidad por haya e informacion completo di e protocolnan aki detayadamente riba e websitenan di HAVA y ASHA, entre otro di malesanan cu ta cay bou di docter di cas y bou specialistanan. E intencion, segun van Trigt, no ta solamente pa colaboracion na beneficio di pashentnan, sino pa duna mas transparencia y siguransa na e pashentnan di loke nan por spera di nan dunadornan di cuido.
