Minister Glenbert Croes:
*Papiando riba e posibilidad di atrae mas hoben profesional
ORANJESTAD (AAN): Minister Glenbert Croes a duna di conoce cu mirando cu tin un scarcedad di trahado, tambe ta papiando riba e posibilidad di atrae mas hoben profesional pa bin Aruba bek.
E mandatario a splica durante un entrevista cu DIARIO cu un di e metanan den su maneho laboral ta pa percura pa e yiunan di tera tambe ta protagonista di e desaroyo cu ta tumando lugar na Aruba y pa nan bin Aruba. Pero tambe pa tur trahado cu a bay den exterior, wak pa trece nan bek.
A agrega cu e hobennan na Hulanda mester motiva nan pa bin bek y esey ta un combersacion cu ta bay tin internamente den gobierno, con ta bay motiva e hobennan bin Aruba bek.
"Si kisas hopi di nan no ta bin pa e salario, pasobra salario na Europa ta hopi mas atractivo cu e salario na Aruba, lo tin otro forma pa motiva nan", e minister a bisa.
Por ehempel, por tin descuento riba nan prestamo di estudio. Mester wak si por tin incentivonan fiscal, sea cu e interes di e 'studielening' of pa ora cu ta cuminsa e carera, crea un categoria di incentivo fiscal pa hobennan cu kier bin bek Aruba, Minister Croes a declara.
