Thomasia AVP:
ORANJESTAD (AAN): Otami Thomasia, miembro di fraccion AVP, y actualmente presidente di comision ‘Asuntonan social’ a duna di conoce den conferencia di prensa cu como presidente, e lo invita diferente organisacion, pa bin Parlamento y duna splicacion, pa asina haya claridad di e situacion actual di cada organisacion, y asina priorisa e puntonan cardinal y brinda sosten na cada un di nan.
Actualmente ta conciente di e realidad di nos pais. Nos ta enfrenta hopi reto, y nos mester bay inverti hopi mas den nos comunidad.
Manera nos tur por a scucha ayera di Minister Wever, no ta e momento pa trece panico relaciona cu e situacion di Merca y presidente Tromp, pero si, ta un momento cu nos mester bay analisa y prepara nos mes como Pais pa bay den e direccion corecto.
Minister Wever a menciona cu ya caba, ta bay cuminsa cu fase 1 di e Proyecto ‘cultivando agricultura na Aruba’. Esaki lo habri 600 cupo di trabou, cu lo trece un impacto positivo riba nos Isla. Nos tur sa cu fruta y berdura na Aruba ta caro, y esaki lo por ta e comienso di un pilar economico alternativo.
Na Boneiro LVV di simia pa producto a haya su draai caba. Awa ta wordo subsidia, y tin diferente lugar unda por yena baki di awa. Tambe tin un flee Market tur diasabra. Pero si, mester menciona, cu si aplica pa esaki tin un training mara na dje.
Den pasado Aruba a inverti den proyectonan, edificionan y centronan deportivo, cu awendia por mira cu mayoria di esakinan ta den un of otro estado critico. Atrobe Aruba lo mester bay inverti miyones den renovacion di esakinan, en bes di miles den mantencion. Ban ta honesto, esaki por ta fondonan cu nos por aloca den cosnan innovativo, cu por wordo realisa a corto plaso.
Nos ta keda enfrenta e problema di adiccion cu ta afecta hopi famia. Esaki kiermen cu nos mester bay inverti mas den proyectonan social cu e meta pa preveni e uzo di droga bou di e hubentud, enbes di lamenta ora nan bay den mal direccion.
Cada siman nos ta mira con nos muchanan ta saca cara di Aruba internacionalmente. Talento nos tin sigur. Pero na mes momento, por bisa cu nos ta faya nan, door di no percura pa nan tin e facilidadnan apropia pa por sobresali mas den nan deporte of arte. No tin un centro caminda e hobennan aki por comparti socialmente cu otro. Nos tin atletanan cu a bay of Merca of Hulanda cu becanan (scholarships) door di nan talento. Ban amplia e posibilidadnan aki pa mas hoben tambe por haya un oportunidad.
Tambe mi kier para keto na diferente organisacion nan cu a hunga un rol masha grandi mes den nos comunidad den pasado, pero pa un of otro motibo, no por haya nan draai bek pa aporta na nos desaroyo humano. Please, mi ta urgi pa manda un mail of tuma contacto cu mi persona, pa asina nos por duna oido y pa hunto nos por bin na un solucion. Nos mester ta honesto cu riba nos isla tin hopi cosnan cu ta bayendo bon, pero tambe tin cosnan cu ta bayendo menos bon. Y si algo ta bayendo menos bon, mester por bin cu solucionnan, pa mehora e situacion. Y pa cuminsa, mester entrega jaarplanning, pa asina por analisa datonan actual y realistico. Nos tur mester cumpli pa por yega na otro y traha cu transparencia.
Mi ta akinan cu e proposito di representa pueblo, y mi ta desea pa pueblo tambe tuma e responsabilidad pa cuida nos Pais, nos muchanan y nos grandinan. Ora di usa centronan seguridad pa nos muchanan ta un prioridad, please no laga nada atras. Ban mantene rond di nos cas, nos barion y centro limpi. Please mantene nos muchanan safe y percura pa nan no ta riba caya te laat. Y por ultimo keda tira bista riba nos grandinan cu ta na cas nan so meld si a ripara cu e persona aki ta bibando den un condicion no apropia. Tin telefon pa adulto mayor pa preveni y combati soledad please yama 125, e ta completamente gratis.
Aruba ta di nos tur y hunto nos tur ta bay dilanti, Thomasia a expresa.
