Parlamentario Jennifer Arends-Reyes:
ORANJESTAD (AAN): E condicion structural di hopi scol na Aruba ta exigi accion planifica, inversion sostenibel y control permanente. Parlamentario y lider di Fraccion di AVP, Jennifer Arends-Reyes, ta desea di wak pa gobierno presenta un plan multianual transparente pa elimina e atraso den mantencion y prepara nos red escolar pa e necesidadnan di futuro.
Un inventario publica ta identifica necesidadnan urgente na 43 scol den diferente districto. E subtotalnan pa e cinco districtonan menciona ta suma aproximadamente Afl. 173,6 miyon, mientras cu e documento ta indica un total di Afl. 137,6 miyon, sin inclui scolnan di Oranjestad y scolnan secundario.
“Sea cual sea e cifra final, un cos ta cla: e atraso den mantencion a bira enorme den transcurso di añanan. Gobierno mester aclara e cifranan y presenta un plan concreto pa atende e situacion,” Arends-Reyes a declara.
Durante hopi aña, mantencion preventivo no a haya e continuidad necesario. Un filtracion chikito cu no wordo drecha na tempo por caba na daña henter plafond, muraya y instalacion electrico. Humedad por afecta calidad di aire, tuberia y baño por deteriora, mientras calor excesivo y falta di ventilacion por afecta concentracion y bienestar di alumno y maestro.
Facilidadnan deportivo, porta, bentana y sistemanan di siguridad tambe mester cumpli cu condicionnan basico. Segun Arends-Reyes, e problema no ta limita na estado di e edificionan, sino ta toca directamente siguridad, salud, dignidad, continuidad di les y calidad di enseñansa.
“Nos no por pidi excelencia den enseñansa si alumno y maestro mester funciona den edificio cu no ta ofrece condicionnan basico,” e lider di Fraccion di AVP a enfatisa.
Inventario completo y prioridad transparente
Arends-Reyes ta propone pa gobierno publica e inventario completo ora ta asina leu, incluyendo condicion actual di cada scol, trabounan necesario, costo estima, nivel di urgencia y e instancia responsabel pa ehecucion. Scolnan cu tin un riesgo directo pa salud of siguridad mester cay den categoria di emergencia. Despues mester sigui situacionnan urgente cu por bira peligroso, mantencion necesario cu mester wordo programa y, finalmente, trabou preventivo pa evita daño den futuro.
Debido na magnitud di e atraso, no ta realistico pa atende tur scol dentro di un solo aña presupuestario. P’esey, gobierno lo mester presenta un plan multianual.
“Si e problema a acumula durante diferente aña, e solucion tambe lo mester pasa pa diferente presupuesto. Pero cada mucha cu ta bay scol awe merece sa cu tin un plan concreto pa drecha su scol,” Arends-Reyes a bisa.
Inversion mester considera tambe futuro di poblacion escolar.
Ademas di identifica cua edificio mester wordo renoba, gobierno mester analiza con poblacion escolar ta desaroya. Cantidad di alumno por cambia pa motibo di bahada den cifra di nacemento, migracion y movecion di famianan entre diferente districto.
Prome cu inverti sumanan grandi, mester analiza e cantidad actual y proyecta di alumno pa cada scol, capacidad di cada edificio y necesidad educativo di cada districto. A base di e informacion aki, mester evalua si tur scol mester keda funciona den nan forma actual of si, den algun caso, fusion entre scolnan por ta un opcion sostenibel pa despues.
“Fusion di scol no por wordo dicidi solamente pa motibo financiero. Bienestar di muchanan, distancia pa yega scol, transporte, calidad di enseñansa, identidad di cada scol y e efecto riba maestro, mayornan y comunidad mester forma parti di e evaluacion,” Arends-Reyes a declara.
Cualkier cambio eventual mester basa riba cifra confiabel y consulta amplio cu schoolbestuur, maestro, mayornan y comunidad. E meta mester ta pa concentra recursonan na unda nan por garantiza mihor condicion, mas calidad y continuidad di enseñansa.
Mantencion permanente pa proteha inversion
Arends-Reyes ta enfatisa cu, ademas di renobacion, cada scol mester haya inspeccion periodico, un presupuesto anual pa mantencion, un registro di defecto, responsabilidad cla y un termino maximo pa atende problema urgente. Esaki ta necesario pa evita cu edificionan renoba bolbe deteriora pa falta di cuido.
E programa di renobacion por crea oportunidad tambe pa contratistanan chikito y mediano, tecnico, electricista, loodgieter, pintor y otro profesional local, semper cu tin supervision adecua, procedimento transparente y control estricto di calidad y gasto.
“Nos mester inverti cu vision, pasobra cada florin destina na enseñansa mester beneficia nos muchanan lo maximo posibel. Un scol sigur y digno no ta un luho; e ta un condicion basico pa bon enseñansa,” Jennifer Arends-Reyes a conclui.
