Parlamentario Shailiny Tromp- Lee:
ORANJESTAD (AAN): Durante e di 2 dia cu Parlamento a trata presupuesto di Pais Aruba pa aña 2022, ayera a trata Ministernan di Turismo y Salubridad y esun di Transporte, Integridad, Naturalesa y Adultonan Mayor.
Parlamentario Shailiny Tromp- Lee a habri prome tanda enfatisando cu nos turismo, nos hendenan y e bon maneho di e crisis door di Gabinete Wever-Croes I y II, nos pais ta den recuperacion. "Nos economia ta depende grandemente di nos turismo. Turismo ta loke ta y a pone nos economia draai relativamente liher bek y manera semper ta e pusher di nos economia".
El a indica cu despues di 2 aña di crisis ocasiona pa e pandemia, por bisa cu Ministerio di Turismo a demostra curashi y determinacion. No solamente a tuma accionnan rapido pa inicia e proceso di recuperacion pero constantemente a y ta tuma e stapnan necesario pa percura cu nos recuperacion ta continuo.
Awe por mira un turismo recuperando, fuerte y resiliente. Tin proyecta cu nos lo recupera entre 85 pa 95% di nos turismo compara cu aña 2019, un aña cu porcierto tabata un di e mihor añanan den historia di nos pais. Mi a subraya cu esaki ta resultado di un bon maneho y sigur ta algo di apaudi. Hotelnan ta yen, revpar ta subiendo y e cantidad di placa cu turistanan ta laga atras ta aumentando.
Durante e reunion el a indica cu e ta contento di mira con nos isla ta recuperando. Aruba ta e pais number 1 den Caribe pa loke ta trata recuperacion. Banda di e recuperacion tin varios proyecto interesante pa turismo cu lo crea empleo y entrada pa gobierno. Proyectonan manera Gateway 2030 cu ta ampliacion di Aeropuerto. Un inversion di $140 miyon.
Port City cu lo mester bay cuminsa e aña aki y proyectonan di Baby Beach, Rodgers Beach y asina varios otro proyecto di embeyecimiento. E parlamentario a pidi Minister Oduber pa elabora riba e proyectonan menciona, indica cuanto cupo di trabou nan lo crea den 2022 y cuanto ta e inversion concreto cu ta bay keda haci den 2022 den e proyectonan aki.
E tambe a subraya, durante e di dos dia di tratamento di Presupuesto 2022, e importancia y necesidad pa sigui enfoca riba un turismo sostenibel. "Mi a comparti mi opinion cu nos mester preveni mas desaroyo turistico construyendo mas hotel y mas bien mi ta sostene e maneho di Boutique Hotels.
Ademas mi a sigui indica cu mas y mas mi ta haya necesario pa no solamente fiha un maneho turistico caminda nos ta tene debido cuenta cu nos capacidad di carga y calidad di bida pa nos mesun hendenan pero na mes momento mester pone mas atencion na nos naturalesa. Como pais nos mester duna mas atencion na nos herencia natural y proteha e tiki naturalesa cu a resta nos aki na Aruba. Un bida balansa den tur sentido di e palabra lo beneficia nos tur!", e parlamentario a enfatiza.
