Jennifer Arends-Reyes
ORANJESTAD (AAN): Segun Sra. Arends-Reyes, ex parlamentario di partido AVP, kende pa añanan largo a enfoca hopi ariba con por contribui pa empodera y yuda nos hende muhernan na Aruba. Segun e World Economic Forum Gender Gap Index 2021, Latino America y Caribe ta na 72,1% compara cu West Europa cu ta casi na 78%. Tin trabou pa hasi riba e topiconan entre otro di participacion economico y oportunidad, Educacion, Salubridad, sobrevivencia y empoderamento politico.
E aña aki dia internacional di hende muher e tema ta kibra e stigma ‘break the bias’. E tarea di nos comunidad henter pa yuda elimina stigma y discriminacion contra hende muher ta sumamente importante.
Aruba tin un populacion di adulto cu tin 6 mil mas hende muher cu hende homber segun ultimo raportage di estadistica data 2021. Y un grupo grandi di mamanan soltero cu tin jiu chikito pa wak pa nan y alavez traha full-time. Aruba no ta pasando su mihor momentonan y decisionnan cu lo ser tuma pa Pais Aruba lo determina con nos comunidad lo surpasa e retonan pa entre otro educacion, salubridad y economia.
Trabou y educacion ta factornan sumamente importante pa e exito di cada hende muher na Aruba y ta conta pa nan bienestar tambe. Aruba mester percura pa tur hende muher tambe logra surpasa cualkier dificultad cu nan ta pasando aden.
Centro di cuido di muchanan y awor tambe cu aumento drastico di schoolgeld gobierno mester por brinda mas cu locual ta brindando na ayudo awor. Sea ta den deduccion fiscal pa aña of bin cu campañanan di incentiva pa companianan por yuda contribui na centro di cuido y schoolgeld di yiunan di nan empleado. Pa asina yuda percura pa crechenan, centro di cuido y scolnan keda acesibel.
Percura pa pidi fondonan na Hulanda specificamente pa renoba e structuranan di dak y coriente di scolnan pa nan por logra panel solar y asina yuda scolnan y a cambio yuda reduci contribucion di ‘airco geld’.
Costo di bida ta sumamente halto y awor cu aumento di gasolin, awa y coriente e ta bira dificil pa famianan por keda cubri nan gastonan normal. Mester percura pa nos grandinan y famianan no cai den pobresa.
Pesey na momento cu hende muhernan bay entrevista of solicita puntra nan con por yuda e persona na yega na e posicion door di brinda training pa e yega na e trabou. Brinda e oportunidad pa emplea y paga hende muhernan cu ta coresponde, tambe wak con nan por crece den nan trabou. Mester percura pa un clima di trabou sano, ofrece workshops tocante e topico y tin protocolnan di con pa anda cu otro pa evita acoso sexual.
Na Aruba tambe tin hopi caso di violencia relacional, un topico cu mester continua brinda concientisacion ariba dj’e. E ta un tarea colectivo pa yuda nos hende muhernan na Aruba por vence tur obstaculo cu por presenta.
Deseando alavez tur nos hende muhernan hopi animo, forza, bendicion y reconoce cu nos contribucion na Aruba ta valioso sra Arends-Reyes ta termina bisando.
