ORANJESTAD (AAN) – Minister di Salud, Dangui Oduber, den conferencia di prensa a bin cu algun recomendacion, pa e ciudadanonan local cu no kier tuma e vacuna contra covid-19 y su variantenan.
E recomendacionnan aki ta pa hisa nan sistema immune, come mas saludable, haci mas ehercicio, cambia nan estilo di bida cu tambe ta un campaña cu gobierno a lanza hunto cu Departamento di Salud Publico, pa asina tin un miho sistema immune, cu ta proteha e persona miho contra covid-19 y cualkier otro virus.
“Loke nos a nota tambe for di estadisticanan cu nos tin, ta cu e personanan cu mas a wordo afecta, cu mas ta core riesgo, pa wordo afecta severamente pa Covid-19 of e variantenan, ta persona cu tin sobrepeso, obeso, cu ta sufri di presion halto, diabetico of pashent di dialisis. E personanan aki ta e grupo di riesgo y ta pa nan, cu nos ta introduci medida pa proteha y cuida nan y evita cu nan ta wordo interna den hospital, pasobra e riesgo pa nan ta hopi mas halto en comparacion cu un persona cu ta den miho estado fisico di salud”, Minister Dangui Oduber a remarca.
Temporada halto:
E mandatario a expresa cu Aruba ta drentando den su temporada halto di turismo, cu ta esun cu mester bira e miho temporada pa Aruba su turismo y su economia. E tabata mustra di ta un high season sumamente positivo y hopi prometedor, pero na e momentonan aki ta coriendo riesgo, pa motibo di e contagionan halto cu nos tin.
“Ta cuestion di algun ora, algun dia CDC ta bay cambia e nivel di riesgo pa Aruba, mirando cuanto contagio tin na e momentonan aki, anto nos como gobierno, practicamente no tin cu tuma ningun medida, pasobra Merca mes a tuma e medida aki pa nos, y nos ta core e riesgo di perde un temporada halto cu ta mustra di ta hopi positivo. Pesey ta necesario pa nos por actua lihe, tuma medida y reduci e contagionan aki, pa asina nos por sigui nos proceso di recuperacion”, e dignatario a señala y a agrega cu ya a nota cu tin algun cien cancelacion. El a reitera cu e ta spera cu por frena e contagio aki hopi lihe, pa asina toch por tin e high season exitoso cu a premira, na momento cu a haci e proyeccionnan na inicio di e temporada halto.
