Monica Kock, Presidente di KvK:
ORANJESTAD (AAN)—E presidente di Camara di Comercio y Industria di Aruba (KvK) mr. Monica Kock, den conferencia di prensa tocante e “Reforma Fiscal” cu Gobierno ta bay introduci, a expresa cu KvK tin temor (pasobra tin e custumber) cu e ley na ultimo momento y den un siman wordo pasa y e pais ta wordo confronta cu un sistema completamente nobo.”Mi lo kier bay den un par di e puntonan cu den nos opinion cu ya nos a trece dilanti pa gobierno. E ta bay tin consecuencia pa esun cu, eigenlijk, no a pone hopi atencion na esaki”, Kock a comenta.
El a agrega cu KvK tin tur e negoshinan registra, y nan sa cu gran parti di e empresanan ta chikito y mediano. Compania chikito ta esnan cu ta di un of dos persona, kiermen negoshinan chikito y hopi biaha nan no por carga un cambio. “Hasta cambionan chikito, despues di un pandemia di covid, ta catastrofico pa un compania. E sistema nobo cu tin, cu yama BTW ta bay duna hopi trabao administrativo, compara cu esun di BBO. E idea di gobierno te awo ta pa bin cu dos tarifa cu awo ta 6% pa cuminda y 14% pa tur e otro productonan. Kiermen, na e comerciante ta wordo exigi cu e mester tene na cuenta, administrativamente, kico ta cay bao di 6% y kico ta cay bao 14%”, Kock a splica.
E dama a agrega cu pa hacie mas dificil, den cuminda por ehemplo, si e persona den un restaurant ta sinta come, envez di 6% e BTW ta cambia den 14%. E idea di gobierno ta cu si e consumidor ta cumpra cuminda “take way” hibe cas, e ora ey ta 6%.
Awo e diferente tiponan di BBO ta un suma pa tur cos, y ta bay tin hopi trabao pa esaki y comercio mester sa esey y prepara pe. Pesey, KvK su keho cardinal ta cu no por ta asina cu e ley aki por pasa sin mas na December y 1 di Januari 2023, comercio tin cu traha cune, mientras cu no ta defini kico ta kico.
“Nos ta di opinion cu mester por lo menos di seis pa nuebe luna, pa comercio por traha y prepara pa esaki. Un punto cu KvK a haya ta cu e quick books cu ta e programa administrativo cu mas hende ta uza, lo tin dificultad pa pone dos tarifa di e porcentahe di belasting; e ta funciona hopi bon cu un. Nan ta bisa cu ta posible pa tuma un quick book, pero e ora ey bo tin cu tuma internacional, y esey ta hopi mas caro. Kiermen, e consecuencianan ta bay ta gastonan adicional y ademas bo tin cu pone henter bo administracion den esey. Pues, tin hopi preparacion si nan ta keda den dos porcentahe pa e comercio”, Monica Kock a remarca.
