Pa restoracion Aruba por ta exitoso mester splica fundeshi autonomia
- Reparticion di bienes, SVB, Cuerpo di Polis, Aviacion parti di pakete
- Nombra Hefe di Departamentonan di Gobierno y atende filial empresarial
ORANJESTAD (AAN)- E entrada di Aruba na 2023 cu celebracionnan cu pa algun aña tabata paralisa, no solamente ta nifica cu Aruba por organisa evento publico, pero tambe ta hiba Aruba na e momento cu e reforma pa futuro mester wordo concretiza.
Aruba mester bolbe na e momento cu e anhelo pa separacion di Aruba di Antia Hulandes, a wordo transforma den un plan concreto cu ta permiti Aruba bandona e impase di un areglo temporal cu a bira un gobernacion cu tabata stroba e Arubiano haci construccion di su pais realidad.
Prome cu Maart 1983, e Arubiano tabata biba den un fantasia constitucional, cu un gobierno (Eilandsraad y Bestuurscollege) cu ta atende asuntonan domestico, pero mara na un gobernacion central cu lo tabata funesto pa Aruba si den e situacionnan actual, Aruba mester a recupera di mal maneho financiero cu a rementa na 2014; di Covid-19, di e crisis di petroleo directamente mara na e Guera di Ukraine.
Status Aparte tabata mas cu un areglo di separacion di Antia den Reino. E pakete di Status Aparte, a haci e Arubiano directamente responsabel pa su pais.
Awe na diferente ocasion, por scucha atakenan di Oposicion cu ta bisa cu Aruba ta suheto na Reino pa e por tuma decision y gasta placa.
Te na e momento cu Status Aparte a drenta na vigor y Betico Croes a laga atras e herencia di su lucha prome cu el a despedi tragicamente di e mundo aki, Aruba tabata mara na man y pia na Antia Hulandes.
E Florin cu tabata circula na Aruba, tabata Antiano y e Banco Central cu tabata maneha e placa di Aruba tabata di Antia.
Aki por topa cu e problema historico pa Aruba bandona constelacion di Antia pasobra na momento cu Aruba a bandona e constelacion aki, Aruba mester a bay cu loke ta pertenencia di Aruba y uza su pertenencia solamente pa Aruba.
Den e constelacion Antiano, placa di Aruba tabata parti di entrada di Antia a base di belasting Antiano pa cubri gastonan Antiano di cual semper e destinacion no tabata Aruba.
Aruba mester a paga pa e Gobierno Central, cu no tabata encarga solamente cu asuntonan di Aruba. E reparticion di gastonan no tabata husto.
Na e momento cu Betico Croes a lanza su cruzada pa Status Aparte, Aruba por a wordo compara como un cas cu mester a wordo drecha pero no por a haci uzo di su propio placa y conocemento pa haci esaki.
Betico Croes a bira dirigente di e plan concreto pa transforma Aruba den un pais autonomo, caminda como lider el a hiba Arubianonan na e pais goberna cu placa di Aruba, cu gobernantenan y Parlamento di Aruba, pero tambe cu tur instancia cu mester sirbi Aruba como parti directo di e pais Aruba.
Betico Croes tabata constructor di un cas Arubano nobo, cu no a duna autonomia no solamente na e aparato Gubernamental, pero tambe na comercio y sindicato.
Filialnan comercial di otro isla na Aruba, a bira empresanan Arubano. Sindicatonan uni den organisacionnan Antiano, a bira Arubano.
Placa di Belasting di Aruba a keda Aruba y mester sostene e Florin Arubano dirigi pa e Banco Central Arubano.
SVB di Aruba a mira luz pa percura pa cuido medico pa tur trahador sin areglo medico, pero tambe pensioen di behez di e Arubiano.
Labor, Economia, Turismo, Asuntonan Social, Enseñansa, Salud Publico, Cultura, Medio Ambiente, a bira responsabilidad Arubano.
Betico Croes a ta creador di e fundeshi estatal riba cual e cas nobo Aruba autonomo a wordo construi pa e Arubiano, cu su propio Papiamento, instrumento pa comunicacion den e prome matutino imprimi na Aruba, na idioma di Aruba, cu capital y sosten financiero di Aruba pa sirbi Aruba!
Awe mester fortifica e cas Aruba cu a sobrebibi olanan bruto for di su nacemento dia Prome di Januari 1986.
Pa traha pa futuro mester comprende e reto cu e Arubiano a acepta pa haci husticia na e pais y entrega e hoben Arubano un pais propio, caminda su placa y esfuerzo ta worde uza pa defende bienestar di su pais Aruba y e Arubiano!
