Gino Frans, Director di Stichting Eliezer:
ORANJESTAD (AAN): Adiccion por destrui bida, silencia bosnan, afecta individualnan, famianan y te hasta comunidadnan. Pero recuperacion ta restaura identidad, forsa, y proposito. Hopi biaha bin afo pa comparti experencianan di sanacion ta tuma curashi. Y haci e compromiso di renobacion pa biba un bida completo y honesto, ta tuma tempo y determinacion.
Director di Stichting Eliezer, señor Gino Frans, den un entrevista cu DIARIO a conta cu 29 aña pasa el a logra sali for di e bisio di droga enfatisando cu el a wordo libera door di e yudansa di Dios. El a remarca cu cos a cambia di mal a peor, comparando e tempo cu e tabata hoben pa actual.
Un cambio sigur cu e ta ripara ta, cu contario na awo, antes no por a cana cu droga ni uza droga riba caya habiertamente manera awendia. Nan tabata haci tur maldad scondi. Antes polis tabata mas streng y hobennan tawatin miedo sabiendo cu si polis gara nan cu posecion of uzando droga, nan ta hiba nan cera, aunke pa un of dos dia, pero esey tabata planta respet den e hobennan.
Segun señor Frans, awo, adictonan ta cana habiertamente riba caya cu pipa den man, y polis no ta kit’e for di nan supuestamente pasobra nan tin derecho. “Tur hende tin derecho pero caminda cu tin maldad, no por tolera esaki. Mester bin mas medida y cambio severo di ley”, señor Frans a remarca.
Pa cu esaki, el a menciona Curaçao como ehempel na unda cu durente un bishita na nos isla ruman, el a ripara cu no tin adictonan ta cana riba caya pa motibo cu tin regla. Adictonan cu wordo gara, ta bay den centro di rehabilitacion y si nan nenga, nan ta wordo cera.
No solamente señor Frans ta mira un solucion den cambionan di ley y medidanan mas severo, pero e ta kere cu organizacionnan cu ta traha den e sector aki, entre otro Stichting Eliezer, Respaldo, Stichting Hunto, mester cuminsa traha hunto, sinta cu otro, y hunto cu Gobierno traha plannan pa bin cu e cambio cu mester y traha riba leynan. Mester bin cu mas programa y habri luga nobo pa hoben pa nan rehabilita.
“Mi ta kere cu nos lo no caba cu e adictonan riba caya, pero si nos tur traha hunto y coopera cu otro, y bin cu ley y medidanan mas severo, nos lo yega hopi leu pa combati e problematica aki”, Señor Frans a enfatisa.
