Oduber ta cuestiona dicon e persona cu lo tin e grabacion ta wordo menaza
ORANJESTAD (AAN): Lider di partido PPA y Parlamentario Otmar Oduber Dialuna mainta a papia riba e caso lamentabel di Ayden Lanoy, kende exactamente dos luna pasa a wordo tira mata pa dos agente policial.
El a splica cu el a papia cu famianan di e victima Diadomingo y e ta sigui trece dilanti cu e caso aki no por wordo permiti di muri.
“E caso aki mester keda bibo y mi ta lamenta cu Parlamento di Aruba no a aproba un amienda di PPA pa pone un fondo disponibel pa wordo uza pa material pa polis incluyendo body cam y mas personal”.
Ta OK pa vota contra e amienda di PPA pasobra politicamente e no ta cumbini bo, pero dicon partido AVP of FUTURO mes no a bin cu un mocion a vota na un manera unanime pa un mocion pa polis por haya ekipo, riba un mocion cu bo mes a firma siman pasa algun dia pasa y cu nos tur a priminti di haci algo, segun e lider di PPA.
Oduber a bisa cu nos tin cu percura pa un caso manera esun di Lanoy nunca mas sosode.
El a indica cu ta lamentable cu ni Gobierno anterior ni Gobierno actual por bisa ki dia Cuerpo Policial ta haya dash cam y body cam.
“Nos a pone fondonan disponibel y pesey nos kier haya sa kico ta bay wordo haci”.
Nos kier mira tambe cu polisnan ta pasa test di droga y mi mes ta bay para dilanti, prome den rij pa haci un test di droga cu polisnan.
Mi kier mira psicologonan tambe presente pa por yuda nos agentenan policial, segun Oduber.
El a indica cu mucho polis ta traha overtime y esey mester cambia, via entre otro personal nobo.
Oduber a sigui bisa tambe cu tur hende kier claridad den e caso di Ayden, mirando cu no ta normal cu polisnan ta tira 18 bala riba un sospechoso.
Lamentablemente despues di dos luna, practicamente ningun hende ta papiando riba caso, mientras cu tin hopi pregunta rond di un caso asina lamentable, unda cu a ranca bida di un persona di apenas 19 aña di edad.
“Tin hopi cos rond di e investigacion cu no ta cuadra, incluyendo e hecho cu un persona cu supuestamente tin un grabacion di locual a sosode ta wordo menaza”.
Nos a yega cerca e persona cu tin e camara y e imagennan aki y cu e ta wordo menaza pa no papia di locual tin riba e camara, segun e lider di PPA, kende a sigui bisa cu na e momento adecuado lo sali divulga e informacion, pero prome lo duna espacio na Ministerio Publico pa haci su trabao.
