Robby Rosel, vocero di BCI:
*Algo hopi tristo pa mira pero un realidad!
ORANJESTAD (AAN) – Vocero di City Inspector, señor Robby Rosel, a referi na un tristo realidad cu entre Mabon cu Rooi Kochi, cu ta cerca di otro “grens cu grens” tin un problema for di aña pasa.
Esaki ta cu hende ta bin tira desperdicio den e u-weg aki. El a splica cu no ta un caminda oficial, pero el a wordo traha durante cu nan tabata trahando diferente cas, poco pabao parti Rooi Kochi.
Rosel a menciona cu BCI a ricibi un melding tocante esaki, cu tin un dump ilegal na e area menciona.
“Nos a bin wak atrobe, pero e biaha aki nos a haya hopi, pero hopi, sushedad. Nos tin cu bisa cu di biaha e Inspectornan a combersa cu DOW, pa sinta na mesa pa bin cu truck pa nos por lanta tur e desperdicionan”, Rosel a duna di conoce.
El a comenta cu tabata tin blokinan, colchon, piezanan di auto, autonan bieu benta eynan, y diferente desperdicio di cas, y el a agrega cu nan a pidi pa nan por parti boet, pero no a logra den e situacion aki.
“Nos a cuminza dialuna cu e limpieza, unda cu a saca mas di diez truck grandi di sushedad, pa wordo deposita y asina a yega na e conclusion cu lo bay pone piedra. Pero pa nos sorpresa Diahuebs nan a bolbe haya desperdicio tira eynan. Nos a mira cu no por warda pa otro siman, y Diabierna nos a bay di biaha pa pone piedra”, señor Rosel a informa.
Vocero Robby Rosel a menciona cu danki na e cooperacion di DOW, nan a pone piedra diabierna mainta, y asina e caminda a wordo cera. Pero asina mes, nan a haya foyo di mata, bloki di cement tira y mester a haci esaki limpi.
Rosel a splica cu esaki ta tereno di gobierno cu ta bezig pa verkaveling, pa diferente vivienda, segun BCI tin entendi, pero no di manera oficial.
“E problema di sushedad a baha hopi en general, pero toch nos tin e problema di sushedad na gran cantidad cu ta wordo tira den mondi. Den barionan el a normaliza bastante, pero den mondi tin hopi sushedad”, señor Robby Rosel a indica.
