Segun Ronella Croes, CEO di ATA:
ORANJESTAD (AAN) – Den entrevista cu DIARIO, señora Ronella Croes, CEO di Oficina di Turismo di Aruba (ATA), a menciona cu enberdad e mercado di Latino America ta creciendo pa Aruba, y esaki tin su motibonan tambe.
“Strategicamente, nos ta enfoca riba cierto paisnan di Latino America, nos a introduci vuelonan cu Latam Airlines algun aña pasa, p’asina bay na e mercadonan mas fuerte manera Chile, Argentina, Brasil, entre otro. Pero tambe nos a introduci vuelonan cu Gol, pa nos bay un tiki mas fuerte pa Argentina y Brasil.
“Tur eseynan ta pasonan cu nos a tuma, deliberadamente, pa nos crece e parti eynan, na Latino America. Y como tal, nos a mira un crecemento di Latino America di 38%, aña pasa, y e aña aki, te cu maart, pues e prome kwartaal di e aña aki, bo ta mira un crecemento di 18% di e region”, Ronella Croes a señala.
El a agrega cu e mercadonan cu el a menciona ta respondiendo fuertemente, incluyendo Brasil, cu e vuelonan di Gol.
“Pues, enberdad esaki ta parti di e strategia tambe. Nos ta sigui riba e caminda eynan. Den e contexto aki mi tin cu bisa cu pa Colombia, basicamente nos kier stabiliza e mercado”, CEO di ATA a menciona.
E crecemento no ta biniendo for di Colombia, necesariamente, pero ta bin di e otro paisnan cu el a menciona. “Cu tin un patronchi di bishitante hopi atractivo p’Aruba, nan ta esnan cu ta keda proporcionalmente, y si mira e base di e bishitantenan di Latino America, nan ta scoge pa keda den hotelnan, un siman sigur. Por pensa aki, di un Latino America cu por score hopi bon, no solamente pa loke nan ta gasta via cumpra di un ticket aereo y estadia den un hotel, pero tambe den e parti di retail, etc., pues nan tin un patronchi diferente”, Ronella Croes a comenta.
“Enberdad e ta un reto pa diferente di nos mercadonan. E ta un reto e posicionamento di Aruba na un cierto nivel di prijs, pero e strategia ta keda pa bo sigui dirigi bo mes riba esey, y purba di haya e ora ey e bishitantenan cu ta cuadra cu esey”, Ronela Croes, CEO di ATA a subraya.
