ORANJESTAD (AAN): Un tarifa nobo di 250 dollar ta necesario pa mayoria di e aplicantenan di visa no-inmigrante pa drenta Merca,
despues di e aprobacion di e Ley 'One Big Beautiful Bill' di presidente Donald Trump. E medida, conoci oficialmente como e “tarifa di integridad di visa,” a wordo confirma pa e Departamento di Seguridad Nacional (DHS) y lo ta aplica na casi tur pais cu no ta forma parti di Visa Waiver Program (VWP).
E tarifa lo wordo cobra na momento di emision di visa y lo afecta esnan cu ta aplica pa visa di turista (B-2), di negoshi (B-1), di studiante (F-1), di trabao temporal (H-1B), y di intercambio (J-1), entre otro. DHS a confirma cu e tarifa ta representa e minimo legal establece pa aña fiscal 2025, aunke e instancia por aumenta esaki pa medio di futuro reglamento nobo. Aunke e legislacion ta provee e posibilidad di debolbe e placa na final di e periodo di valides di e visa, e procedura no a wordo defini ainda y ta someti na cumplimento cu rekisitonan estricto, loke, den practica, ta haci e tarifa no ta bin bek na e aplicante.
-Impacto financiero directo riba famianan y individuonan cu ta biaha pa turismo, estudionan of bishitanan temporal
E tarifa nobo lo impacta directamente famianan completo, studiantenan internacional, y trahadonan temporal cu ya ta enfrenta gastonan halto asocia cu aplicacionnan di visa, pasashi di avion, seguro di salud, y otro gastonan relaciona cu biahe pa Merca.
Por ehempel, un famia di cuatro persona cu ta bishita e pais pa turismo lo haya nan mes cu un aumento automatico di 1,000 dollar pa e tarifa di integridad di visa so, sin inclui proceso consular, paspoort y gastonan di biahe.
Newsweek a informa cu e medida aki ta segun guianan nobo promove pa e gobierno federal, cu tin como meta pa reduci inmigracion no autoriza y controla fluhonan di migracion legal mas estrictamente. “E tarifa ta conta pa tur solicitante di visa no-inmigrante di paisnan pafo di VWP,” e outlet a señala.
E tarifa nobo di integridad di visa lo ta obligatorio pa aplicantenan di paisnan manera Mexico, India, Brazil, Nigeria, Rusia, Sudafrica, Filipina, China y Pakistan, y tambe casi tur pais na Africa y Medio Oriente. E paisnan aki no ta forma parti di e VWP, un programa cu ta permiti entrada sin visa na cierto ciudadanonan di paisnan designa pa Merca.
Departamento di Estado a publica un lista preliminar cu lo sirbi como guia pa embahadanan y consuladonan rond mundo. E peticionnan pa visa lo no wordo procesa sin pago di e tarifa nobo, cu mester wordo completa prome cu e documento wordo emiti.
Trahadonan stranhero lo enfrenta un peso financiero y administrativo mas grandi, y dunadonan di trabao lo mester tuma decisionnan di gasto.
Trahadonan cu ta aplica pa visa di trabao temporal—manera e visa H-1B pa profesionalnan specializa—tambe lo ta someti na e tarifa nobo. E grupo aki mester cubri otro pagonan caba, incluyendo un tarifa di aplicacion di 780 dollar y un tarifa contra fraude di 500 dollar, cu generalmente ta wordo carga pa e dunado di trabao.
Companianan lo mester dicidi si nan ta absorbe e peso nobo aki como parti di e beneficionan di empleado of pasa e suma directamente pa e trahadonan. Den tur dos caso, e resultado ta presion adicional riba procesonan di contratacion internacional.
DHS a confirma cu entrante 2026, e tarifa di integridad di visa lo wordo ahusta anualmente pa refleha inflacion. Esaki ta habri e porta pa mas aumento den e proximo añanan, loke por aumenta mas ainda e peso financiero pa ciudadanonan di paisnan cu ya ta confrontando restriccionnan economico pa biahe pa Merca.
