Ta haya cu mester trece e informacion awo riba mesa
- Parce cu tin dos potencial campo di gas
- Mester tuma decision corecto riba esaki
ORANJESTAD (AAN): Den fin di siman, Fraccion MEP a haci un peticion formal na presidente di Parlamento Marlon Sneek, pa convoca, cu caracter di urgencia, un reunion den Parlamento cu e compania estatal Compania Arubano di Petroleo (CAP). Motibo di e peticion ta e falta di informacion na Parlamento tocante deliberacionnan cu ta wordo sosteni cu e compania Armstrong riba posible actividadnan di explora gas offshore.
E peticion aki a bin despues di informacion reciente cu a wordo comparti durante un reunion cu San Nicolas Business Association dia 5 di februari 2026. Durante e reunion aki a indica cu tin dos campo potencial di gas cerca di Aruba, cu por wordo desaroya di forma rendabel den un periodo relativamente corto, pero cu e siguiente pasonan ta depende di decisionnan di gobierno di Aruba.
“No ta bon cu Parlamento, y asina tambe e comunidad Arubano, no ta wordo informa na tempo y di manera completo tocante desaroyonan di e magnitud aki,” segun lider di fraccion Evelyn Wever-Croes.
“Transparencia no ta un fabor, sino un obligacion democratico. Especialmente ora ta trata di decisionnan estrategico cu por influencia e futuro economico di nos pais.”
Segun Wever-Croes, Aruba ta para na un crusada importante. Nos economia no por y no mester sigui ta basa casi exclusivamente riba turismo. “Precisamente den un tempo di inseguridad global, ta necesario pa investiga seriamente pilarnan economico nobo y durabel. Esaki ta rekeri transparencia y un debate serio, basa riba informacion actual y corecto.”
E peticion na e Presidente di e Parlamento pa un “openbare bijeenkomst” tin como meta pa haya claridad tocante, entre otro, e naturalesa di e conbersacionnan cu Armstrong, e rol y hayasgonan di CAP, e maneho tocante energia offshore, y señalnan cu Aruba posiblemente lo ta ‘off the market’ pa e tipo di desaroyo aki. Si Aruba ta sigui manda e señal dit a “off the market” pa e desaroyo aki, nos lo perde tur oportunidad. Esaki no ta un decision cu un gobierno cu un mayoria minimo por tuma nan so, nan mester delibera cu Parlamento riba esaki.
“Cualkier cu ta e direccion cu Aruba scohe, e decision ey mester ta haci di forma consciente, transparente y cu participacion di Parlamento,” Wever-Croes a enfatisa. “P’esey, un reunion liher cu CAP ta esencial. No mañan, sino awor.”
