Manera stipula pa ley prome cu 1 di April
ORANJESTAD (AAN): Ley ta stipula cu cada partido político mester entrega un relato anual financiero prome cu 1 di April di e aña siguiente. Lider di partido Movimiento Electoral di Pueblo (MEP) Evelyn Wever-Croes a indica cu partido MEP, manera ley ta stipula, e entrega e relato anual di aña 2024, dia 31 di Maart 2025.
Lider di partido a splica cu e relato aki ta refleha no solamente e operacion di e partido pero tambe campaña electoral 2024. Entradanan di partido MEP ta consisti di contribucion di miembronan, di donacionnan y di e actividadnan di fundraising di cual tur a worde declara na Electorale Raad.
E gastonan di partido tabata mayoria operacional, mirando cu partido MEP a traha hopi riba e infrastructura di cede. Paden a worde drecha y pafo comunidad completo por admira e bunita mural. Tambe partido MEP a inverti den e ultimo campaña cu tabata uno hopi intenso. Pa cu e gastonan, por nota den e relato anual cu a keda un debe chikito ainda na banco cu lo mester cumpli cu ne den e proximo simannan
“Mi kier gradici nos presidente señor Ricky Hoek, nos tesorero, y tur esnan cu a yuda nos traha riba e relato anual aki pa asina partido MEP un biaha mas por cumpli cu ley manera ta stipula cu mester entreg’e prome cu 1 di April” Lider di partido a expresa.
