Awe 1 di October 2025
ORANJESTAD (AAN): Riba un dia manera 1 di October, Dia di nos Grandinan, Ivo Valdes kende ta president di Organizacion di Pensionadonan Publico Arubano (OPPA) a trece un mensahe, cu segun su opinion e tin di sirbi como un homenahe di gratitud, amor y respet, pero tambe un yamada pa proteha y defende nan derecho y dignidad.
Awe nos ta para cu gran gratitud pa honra y reconoce nos grandinan. Nan ta e raiz di nos famia y e fundamento di nos nacion. Nan a traha, sacrifica y lucha pa duna nos un futuro miho.
Tur logro cu Aruba tin awe, tin su reis den e esfuerzo y dedicacion di nos grandinan. Honra nos grandinan ta mas cu un palabra bunita, nos mester duna nan e respet cu nan merece tur dia.
Ta asina nos por mustra cu nos ta aprecia e rol cu nan tabata tin y cu nan tin te awe: como consehero, como guia, como ehempel di fortaleza.
Nos por reconoce nos grandinan riba e dia aki: (*) Cu un palabra di amor y gratitud, mustrando cu nan no ta lubida. (*) Cu un gesto di atencion y cariño, pasobra hopi biaha un abrazo of un bishita, nan ta balora mas cu oro. (*) Cu un compromiso como comunidad y gobierno, pa sigui defende nan derecho pa un bida digno, cu cuido, proteccion y respet. (*) E momento aki ta pidi nos un refleho. (*) Dia di nos Grandinan ta un recordatorio.
Un pais cu ta honra su hendenan grandi ta un pais cu ta crece cu dignidad y ta defende su mes futuro.
Nos grandinan ta e pilar di desaroyo, nan ta reis di e comunidad.
Ivo Valdes a finaliza bisando: “Laga nos no wak hende grandi como un carga sino como tesoro cu tin un balor incalculabel. Na nomber di directiva di OPPA y tur su miembronan, mi ta desea tur hende grandi un feliz dia.”
