Bettina Maduro, 'certified clinical coach':
ORANJESTAD (AAN): Siman pasa na Biblioteca Nacional a tuma lugar un charla hopi interesante caminda a elabora riba e tema 'Menopausa'. Esaki a wordo imparti door di Sra. Bettina Maduro, kende ta un 'certified clinical coach' den sexualidad.
E sala di biblioteca na Playa tabata yen di hende muher cu tabata kier haya mas informacion tocante e tema aki ya cu 'menopause' ta un tema hopi popular awendia y tin hopi pregunta rond di e tema aki.
DIARIO a tene un entrevista cu Sra. Maduro na su oficina y el a duna di conoce cu su pasion profundo ta pa asisti hende cu nan asuntonan di bida en general pa nan yega na biba feliz. P'esey el a interesa mas den e tema di sexualidad y a bay studia esaki mas profundo. "Mi ta kere firmemente cu dialogo habri riba educacion sexual ta esencial pa bienestar general di hende", el a bisa.
"Hopi hende ta sufri den silencio pa motibo di 'taboo', mal informacion, of falta di support den e area di sex y salud sexual. Mi ta sinti cu e ta mi mision pa yuda kibra e taboo y crea un ambiente sigur caminda hende por siña, haci pregunta, y busca guia sin sinti berguensa.
Mi kier yuda hende pa nan por desaroya un relacion mas positivo y saludabel cu nan mes y cu nan partner, por medio di comunicacion habri y cu confiansa", Bettina Maduro a agrega.
Ta bon pa agrega cu un aspecto di bida hopi importante, specialmente pa hende muhe, pero cu tambe ta rondona cu 'taboo', ta menopausa.
Menopausa ta un fase importante den bida di un hende muhe, cu ta trece cambionan fisico, emocional y psicologico. Aunke cu e ta algo comun, pasobra mayoria hende muhe ta pasa aden.
Menopausa ta keda un tema rondona cu negativismo y berguenza. Mayoria biaha, mal informacion ta laga hende muhe, nan casa, y partnernan sin preparacion y sin sosten. E falta di conscientisacion y comprension no solamente ta afecta e bienestar di e hende muhe cu ta pasa den menopause, pero tambe ta afecta nan bida profesional y productividad en general, Maduro a expresa.
"E satisfaccion di mira e impacto positivo cu mi por tin riba bida di un hende, yudando
nan pa bira mas confia, feliz, y saludabel, ta e motibo principal cu mi a scoge pa bira un coach", a declara.
Den un articulo apart lo sigui elabora riba e tema importante aki di menopausa y rond di un proyecto interesante cu Bettina Maduro ta bezig cu ne cu tin como meta yuda e hende muhernan cu ta den fase di menopausa.
{gallery}Menopausa ta un fase importante den bida di un hende muhe, cu ta trece cambionan fisico, emocional y psicologico{/gallery}
