Hulanda bou presion ta tuma medidanan pisa contra immigracion
*Aruba por wordo confronta cu resultado di accion pafor di su teritorio
ORANJESTAD (AAN) — Na e momentonan aki na dos forma Aruba mester tene na consideracion resultadonan cu un migracion creciente na mundo, por tin influencia pa Aruba.
DIARIO ta den contacto estrecho cu informantenan riba e situacion cu a surgi na Merca, caminda medidanan ta wordo tuma pa cera porta pa personanan sin permiso di estadia na Merca y hasta contra otorgamento di ciudadano Mericano.
Un bom por a rementa cualkier momento segun advertencianan di basta tempo di DIARIO tambe, awor a rementa y tin resultado directo pa paisnan den vecindario directo di Aruba tambe.
E forma cu Merca cu man duro ta bay contra entrada ilegal di e pais, por tin resultado pa Aruba tambe.
Immigracion ilegal manera tanto biaha DIARIO a splica, ta directamente mara na condicionnan di bida pero tambe un peliger creciente pa bida di hende dor di condicion di guera y violencia rond mundo.
Gobierno Mericano a cuminsa yena avionnan cu hende cu mester regresa nan pais despues di entrada ilegal na Merca.
Na Hulanda mientrastanto, e maneho di asilo tambe ta wordo cambia dor di e Gobierno actual cu ta mustra cu Hulanda no ta capaz pa carga cu e gastonan y problemanan cu e situacion cu ta presenta ta produci.
Peticionnan serio di diferente instancia ta wordo haci na e Ministro di Asielo, Faber, y ta mes momento ta bira tambe un alerta pa Aruba, cu ta conoci cu e forma cu Hulanda ta wordo uza como pais di migracion pa Arubianonan hasta cu problema personal.
Informantenan clave di DIARIO a indica cu e forma cu Gobierno Hulandes ta actua actualmente ta e antesala pa cuminsa papia riba e desigualdad cu tin actualmente den den Reino caminda Arubianonan y otro ciudadanonan Hulandes di Caribe tin entrada liber na Hulanda loke no ta e caso cu ciudadanonan di Hulanda cu kier establece nan mes na paisnan Hulandes den Caribe.
Informantenan ta papia di situacionnan serio cu e accionnan Mericano por provoca indirectamente pa entre otro Aruba pa medio di refugiadonan cu ta busca nan auxilio mientras cu mester keda atento pa loke e problemanan na Hulanda ta produci pa e pais, cu ta den un situacion financiero dificil y mester corta entre otro den gastonan di su hospitalidad.
